03/04/2024 16:29
《小傳日記》小米異軍突起,最傷係邊個?「蔚小零」可能會傷啲!
《小傳日記》近日市場熱話離唔開小米(01810)的SU7。呢款電動車於3月28日正式上市後,市場反應熱烈。即使第二輪追加開售亦全部售罄,聽聞部分訂單交車時間更已排到半年後。據雷軍表示,小米汽車SU7純電動車推出幾日,已經收到10萬張大訂,並鎖定4萬張單。如此驕人成績,可能連雷軍都意想不到。 舊年12月底嘅汽車技術發布會,雷軍曾豪言,要喺15至20年內躋身成為世界五大車企。當被問及新車定價時,雷軍表示唔好估9萬9,亦不好講14萬9呢個金額,淨係小米新車嘅配置同表現,就值40萬(人民幣)以上。結果,市場就揣測小米嘅車會走高端路線-高性能同高價格。但喺上個禮拜,SU7正式上市時,標準版只賣21﹒59萬元人仔,比起蔚來(09866)、小鵬(09868)及理想汽車(02015)嘅入門版售價更低,結果引來一眾「米粉」熱烈捧場。 對小米嚟講,第一炮的確打得響亮。但呢一炮亦意味住本來已經競爭激烈嘅電動車市場,又多咗一個對手,而且係一個強勁嘅對手。小米崛起,最傷係邊個?首先,比亞迪(01211)畢竟係內地電動車龍頭,銷量大、底子厚。就算內銷市場被分薄些少,但有品牌效應,可能借助出口抵消返。 至於電動車新勢力嘅「蔚小理」之中,理想舊年「脫貧」又升呢,年度營收按年飆升一倍幾,兼且首個年度有錢賺,算係上咗岸。雖然未來銷量多少會受到影響,但畢竟實力係三家企業中最硬淨,短期內不至於太傷。剩返蔚來、小鵬要面對嘅挑戰就更大。2023年內地新能源車銷量大幅增加三成幾,而兩家車企嘅營收都只係上升一成幾,遠遠落後!加上本身仲未有錢賺,今年除咗要面對市場嘅價格競爭之外,仲要多咗一個強勁對手,未來嘅賽道一啲都唔易跑。 唔信?望返尋日嘅股價表現,多少都睇到啲玄機。尋日小米股價藉住SU7銷情飆升,最多升一成六,收市雖然升幅收窄,但仍升9%。恒指亦抽升390點,升幅2﹒4%,係近半個月來最大嘅升市。但蔚來同小鵬就斯人獨憔悴,股價逆市下跌,其中小鵬跌幅超過半成。同樣逆市下跌嘅仲有零跑汽車(09863),尋日股價更加急挫8%,頗有「同是天涯淪落人」之感。睇嚟大家以後都係唔好再慣性叫「蔚小理」啦,不如改口叫「蔚小零」,可能會更貼切。請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
WoW WoW星期三:健康網購產品低至$99!(只限今天)► 火速行動