《小傳日記》原本以為美國通過《生物安全法案》之後，藥明長期被美國嘅針對終於可以告一段落，但繼藥明系之後，美國似乎又喺大選年內搵到新對象，今次中招就係金斯瑞（０１５４８）。　　金斯瑞噚日下晝發通告，提到注意到美國眾議院一個特設委員會，有成員向ＦＢＩ同美國國家情報總監發信，其中提到金斯瑞同旗下三間子公司，要求調查以確中國政府對於金斯瑞運作嘅影響力。而金斯瑞喺通告就強調，信函入面並無提到集團有任何非法行為，更加澄清公司係並無受到任何政府嘅控制，未來會積極同上述委員會接洽，「並幫助對方增進對公司業務的了解」。但事涉ＦＢＩ，金斯瑞今日最多跌過兩成半有多，收市跌近一成八，報８﹒２３銀。　　以目前情況，暫時美國眾院都應該無真憑實據指控金斯瑞涉及國家安全問題，而只係可以出信要求調查，亦好似金斯瑞咁講目前係無證據證明公司有任何非法行為。但繼藥明系之後，金斯瑞會成為美國打壓中國生科嘅下一個對象都唔係全無原因。　　據金斯瑞２０２３年全年業績，集團最大收入佔比係來自「生命科學服務及產品」，佔全年收入４８﹒２％，達到４﹒１３億美金；其次就係「生物製劑開發服務」，佔全年收入１２﹒７％，達１﹒１億美金。即係金斯瑞全年有超過六成收入，都係來自ＣＸＯ業務，同藥明系都不相伯仲。更加重要嘅係，以地區分部嚟睇，美國地區收入喺２０２３年有成５﹒０６億美金，佔公司全年收入６０﹒２％，既係ＣＸＯ，又係以美國市場為主，正好成為藥明之後嘅打壓對象樣辦。　　而今日消息傳出之後，金斯瑞亦好似當年嘅藥明一樣出現巨大跌幅，亦證明美國眼光，又揀到一隻一有消息又可以大冧嘅股份。過去呢兩年，藥明生物（０２２６９）喺美國嘅業務都愈縮愈細，所以假如金斯瑞被「老大哥」盯上，可能難逃業務被迫削減嘅後路，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】etnet全新頻道盛大推出！全港最齊盛事活動資訊盡在掌握！► 即睇