《魚缸博客》上日筆者先講完以色列同黎巴嫩真主黨接近簽署停火協議，結果又真係好順利咁簽咗，以色列將於６０天內逐步撤兵。不過孖屐開心一陣好啦，中東政治既涉及千百年來嘅宗教問題，背後又有大國之間嘅計算博弈，邊可能當粉筆字咁一筆勾銷呢？真主黨可能視停火為喘息機會，留待日後再戰，以色列都唔會相信黎巴嫩會撤回所有重型武器，隨時再發動自衛權，火藥桶再點過。　　　講番神州，最近網上流傳一份名為《２０２５年比亞迪乘用車降本要求》嘅郵件，疑似係比亞迪（０１２１１）執行副總裁、乘用車首席營運官何志奇向各供應商發出嘅，信中要求相關供應商所供貨產品要從２０２５年１月１日起降價１０％。信入面雖然好禮貌咁「您」嚟「您」去，但內容卻一啲都唔客氣。　　　郵件話，比亞迪全年預計突破４２０萬輛銷量大關，但明年市場競爭將更加激烈，進入「大決戰」、「淘汰賽」，所以先要「要求」供應商降價。其實車企內捲互相廝殺你死你事啫，點解仲要上游廠商陪你哋一齊捲呢？事件引發炎上後，比亞迪ＰＲ喺微博發文回應，話與供應商嘅年度議價係慣例，降價唔係強制要求喎，但又提到公司會規模化大量採購，暗示供應商應通過減價換取市場，價低者得，一定係「自願」啦。　　　神州新能源車企出海歐美受阻，開拓第三世界市場又唔夠肉食，最後咪又要回到國內繼續鬥平。特斯拉、比亞迪力保龍頭地位，央企大廠有轉型壓力，新勢力品牌要加速推車型爭取實現盈利，小米（０１８１０）、華為落場攪局，仲有一眾互聯網企業投放無人的士搶攻智慧出行藍海，賽道「大塞車」就問神州同胞如何消化？　　　有大行行業分析師提到，除咗車企產能大增，由於明年初有關新能源車補貼政策將完結，消費者會期待下一輪補貼政策出台，而明年春節長假又提早至１月底、故料需求趨弱，預期內地汽車減價戰會比往年提早出現。有見及此，比亞迪「請求」供應商降價，都係無奈之舉。　　　話說回來，神州車企為咗打贏其他對手，可以要求供應商降價，可以要求員工日日ＯＴ唔放假，又有國家政策同地方政府扶持，仲有粉絲日日喺網上搖旗?喊，呢啲優勢外國車企真係望塵 莫及。只不過筆者強調，行業內捲最終係無贏家嘅，不存在贏者通吃，你今日打贏對手，聽日就有第二第三第四家企業落場（當然，喺國內生產新能源汽車係需要生產資質），產品永遠無得提價，企業長期喺虧損邊緣掙扎，咁又有咩意義呢？　　　最後同大家睇睇比亞迪股價走勢，技術上股價１１月初以來一直走下坡，但係今日去到１００天線（約２５２﹒８６銀）托咗一下，都算有少少支持，等佢再穿１００天線可以試下入注，搏佢年底出大字報公布全年銷量嘅時候有得升，不過到明年年初銷售淡季再加減價戰白熱化，就好擇價離場啦。　《編者按》本欄搜羅即市傳聞，惟消息未經證實，《經濟通》亦不保證內容之準確性。

想要獨家投資理財Tips？即Like etnet 全新Facebook專頁► 立即讚好