《小傳日記》上個周末（１３日），中國電動車企蔚來（０９８６６）創辦人、董事長兼首席執行官李斌喺美國發表演講，呼籲美國開放市場。李斌喺哈佛大學嘅一次活動上發言，話開放係中國智能電動汽車滲透率迅速提升嘅重要原因之一，全世界嘅優秀汽車產品都可以喺中國銷售，唔會因為來自邊個國家而被針對。　　尋日（１５日）網傳一張顯示為「中國銀行業務溝通群」嘅對話截圖，圖中顯示中行（０３９８８）某省分行要求即日起暫停辦理新車個人貸款業務。唔做極氪、理想（０２０１５）、嵐圖、蔚來業務，而且要求務必執行到位。有關截圖立即引起廣泛關注，搞到尋晚蔚來美國ＡＤＲ股價插半成，唔知對身處美國嘅李斌，係攞景定贈慶？　　雖然內媒隨後引述相關企業澄清，貸款業務並未受任何影響，強調網上傳聞並非事實。不過唔知係巧合，定係受到呢單料影響，今日幾隻相關股票都跑輸大市。當中，又以蔚來跌得最甘，股價跌一成，仲跌穿３０元大關，創香港上市以來新低，真係慘慘豬！　　人心虛怯，只因公司年年燒錢，而且唔知燒到幾時先可以有錢賺。睇返公司過去４年業績，年年蝕錢，而且金額一年比一年多。２０２０年度，公司營收按年升一倍多，虧損金額亦從之前一年嘅１１４億人仔減到５６億人仔，唔少投資者都憧憬緊，可能好快就可以扭虧為盈。點知２０２１年又打回原形，蝕過百億人仔。到咗２０２３年，虧損金額更加飆升到２１１億人仔。粗略估計，公司６年來總共蝕咗大約８６６億人仔。亦難怪舊年年底，公司不斷傳出裁員，甚至倒閉嘅消息。要出動創辦人李斌，聯合創辦人，總裁秦力洪出來澄清。　　雖然倒閉嘅事有Ｄ危言聳聽，兼且言之過早。但大家都計緊條數，以每年蝕２１１億人仔嘅速度，手頭上嘅４００多億現金夠燒幾耐？所謂「前無去路，後有追兵。」上月小米（０１８１０）ＳＵ７開始接受訂購後，市場反應熱烈。投資者開始擔心，ＳＵ７的崛起，可能分薄了蔚來嘅市場。蔚來３月底公布，調低首季新車交付量預期至３萬輛，按年跌３﹒４％。加上年初以來各大車企的價格戰，首季營銷隨時量價齊跌，難怪公司股價近期不斷尋底，蔚來嘅未來可以講係荊棘滿途，已經上咗車嘅就要自己執生。請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】etnet全新頻道盛大推出！全港最齊盛事活動資訊盡在掌握！► 即睇