《小傳日記》農夫山泉（０９６３３）就好似清新壯麗嘅瀑布一樣，由５月起開始出現兩年以來最長嘅「飛流直下」跌勢，時而面對樽裝水減價戰，時而連賣冰都要同人爭過，可謂頭頭碰著黑。正當股價喺低谷掙扎之際，消委會一句「農夫山泉礦泉水溴酸鹽含量達歐盟上限」，令股價再創兩年新低，於是農夫山泉終於忍唔著，出信怒斥消委會。　　消委會係香港嘅法定機構，屬於商務及經濟發展局管理，每個月都會公布調查市面產品檢驗結果，一向形象都係有碗話碗，有碟話碟，好少會有被驗產品商家駁斥消委會，今次農夫山泉一著實屬罕見。消委會噚日發布今個月嘅調查結果，其中檢驗礦泉水嘅結果入面，全部３０款樣品都通過微塑膠、塑化劑、微生物、金屬雜質等等測試，但就特別提到，農夫山泉同百歲山嘅樣本都含有化學物質溴酸鹽，每公升含３微克，達到歐盟標準上限，確實無超標，消委會總幹事黃鳳嫺都表明，喺上限之內都係可以安全飲用。　　溴酸鹽係喺水嘅消毒過程形成嘅化學物質，如果過量攝取係會引致腹瀉嘔吐，甚至影響神經系統。明明係喺標準之內，但就被消委會點名話「達到歐盟上限」，已經周身麻煩嘅農夫山泉就大力反擊消委會。農夫山泉向消委會發嘅律師信講明，消委會將農夫山泉定義為「天然礦泉水」，但實際農夫山泉係採用深層湖水所造成嘅「天然水」，因此唔應該用歐盟「天然礦泉水」嘅標準嚟規範。　　律師信又強調，產品喺香港銷售，一定跟足本地生產標準要求，「強行將中國香港地區銷售的產品套用並不應適用的第三方標準」係罔顧唔同法規下嘅生產、技術背景差異，得出嘅結論「極不科學也極不嚴謹」。律師信仲乘機「潤」消委會，話「任何標準只有『合格』或『不合格』，使用『上限』或『下限』是明顯故意錯誤、有意誤導」，話消委會文章用語十分不專業，要求消委會書面澄清同道歉。消委會收信後就表示會研究同跟進，強調文章嘅重點係強調樽裝水嘅膠樽對環境所構成嘅影響，並非指產品有安全問題。　　農夫山泉近期面臨水浸眼眉嘅境地，半年來有生意競爭，又有口舌是非，呢兩個幾月以來一有咩消息都可以令股價急跌，今次再有消委會一搞都真係幾頭痕，難怪成封律師信除咗澄清之外更加用字不留情面，可見而家農夫山泉對於消息嘅敏感度都喺極高嘅戒備狀態。　　事實誠如消委會所講，今次針對樽裝水嘅研究，雖然多個樣品都喺多項檢測入面無發現任何問題，但消委會呢篇研究嘅主旨就係有問題固然唔好飲，無問題就不如飲水喉水，慳錢又慳膠樽，無論結果係點都想呼籲人少買樽裝水，實則上就係想為「走塑」出一分力。原先想針對「樽」，但就唔小心針對咗「水」，惹來農夫山泉嘅激烈反應。　　如今農夫山泉信都出埋，消委會之後無得唔回應。農夫山泉今次企得咁硬，就算係法定機構都照出律師信，除咗上面擲地有聲嘅論證之外，咁啱國家主席習近平喺噚日三中全會之上就提出一個新字眼，提到唔可以「食洋不化」。雖然講緊嘅係國家大方向發展，但用「歐盟標準」規範「國產樽裝水」，又算唔算係「食洋不化」呢？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

夏日中暑高風險！即睇中暑迷思＋預防措施！► 立即了解