《小傳日記》上星期四，香港著名實業家、銀娛（０００２７）及嘉華國際（００１７３）主席呂志和博士安詳辭世，享年９５歲，佢嘅一生正正係香江歲月風雲變遷嘅寫照，港澳兩地政商界都對呂志和嘅辭世表示傷感同哀悼。　　呂志和唔單止係一個成功嘅企業家，亦係香江經濟騰飛嘅重要旗手。呂志和自１９５５年創立嘉華公司以嚟，帶領集團積極參與香港本地嘅填海、筑路、隧道工程同埋機場建設，東九龍、秀茂坪、樂富、藍田及油塘等嘅大型填海工程都多得佢出力，為香港嘅繁榮穩定打下基礎。六十年來本港三成嘅石料都係由嘉華集團供應，所以呂志和仲有個稱號叫「石礦大王」。　　呂志和亦熱心支持教育事業，促成中大開設酒店及旅遊管理學院，同埋理工籌劃興建教學酒店，後續亦一直資助兩所大學相關學院嘅發展，為港澳酒店業輸送大量人才，另外佢又支持興建修繕內地１２２間中小學。呂志和喺教育方面最值得一提嘅貢獻就係喺２０１５年，佢出資２０億創立咗國際獎項「呂志和獎－世界文明獎」，希望表揚對世界文明發展作出貢獻嘅人士或者團體，推動世界更加和諧嘅心願。　　提到富豪離世，大家都熱衷於討論後代家產分配問題。呂志和喺好耐之前嘅報道中提到，佢當時會將旗下公司嘅棒交畀五名子女，每人負責一種業務，當中最值錢嘅澳門賭業同中港物業發展，分別由長子呂耀東同三子呂耀華負責，以保家庭和諧，不過隨著家族成員分管業務，唔同地區業務之間嘅協同性可能會逐漸消褪，呢個就係第二代接班人要面對嘅問題。　　從１３歲街邊賣南乳花生開始，到最後坐擁地產及賭業王國，呂志和嘅資本傳奇當然令人鼓舞，不過如今香江則面臨樓價過高扼殺城市活力嘅困境，基層市民較難向上流動，猶記得呂志和曾經講過，記者起碼都有４萬至５萬元人工，事實係過咗咁多年，記者起薪點依然毫無長進，令不少人才轉投其他行業，如果想香江經濟重返黃金年代，不妨從記者加人工開始，請請！　　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票