13/06/2024 17:06
《小傳日記》歐盟重收汽車關稅!但邊收邊放水?比亞迪值追?
《小傳日記》魚缸今日表現又係平平淡淡,噚晚堆美國料算係好壞參半,雖然點陣圖顯示今年比較大機會只係減一次息,但係鮑威爾口頭上係鴿味重啲,令到噚晚道指跌納指升。但歐洲方面就陰險啲,終於正式宣布重量級懲罰性關稅! 歐盟噚日宣布對中國進口電動車加徵額外臨時關稅,喺現時10%的進口稅之上,再額外重收關稅。但有趣嘅係比起美國劃一實施,歐盟收法係大細超咁收,其中大佬BYD(01211)係收17﹒4%,吉利(00175)就係20%,而其餘肯配合調查嘅車企就收21%,唔聽話就勁收38﹒1%,其中上汽(滬:600104)因此成為重關稅嘅第一滴血,被額外加收38﹒1%關稅! 雖然收關稅消息震撼,但都唔係完全突發,事前都已經吹風好一段時間,孖屐本身都預期今次會收鑊甘,但最終出嚟普遍都係大約兩成,而龍頭BYD再收少接近3個百分點,明顯有放水意味,所以孖屐今日都食著呢條水,大舉掃貨BYD,全日炒高差唔多6%。 雖然係經濟上嘅政治行動,但歐盟同美國宣布加徵關稅前,似乎都係有對中國做「事前預告」。白宮喺宣布針對晶片、光伏同汽車等等產品加徵關稅前,4月就有財長耶倫訪華;而今次歐盟宣布加收關稅前,國家主席習近平就事先應邀出訪法國,同法國總統馬克龍加上歐盟委員會主席馮德萊恩開會,時間上有可能當時有同阿爺單聲都唔定。 而歐盟呢個玩法都幾靈活,加咗關稅向美國表明係同一陣線,但又借啲易鬆咁啲,令到歐盟內部都有平車可以買。而另一方面講明配合調查同唔配合調查係會有唔同待遇,稅率差別成17個百分點,令到歐盟對於中資企業嘅監管可以更加大,解除一部分嘅政治憂慮。 驚咗咁耐嘅關稅終於公布咗,被視為車股嘅一大不明朗因素終於消退,令車股今日都普遍報升。新稅率7月實施,但要留意11月會再有表決,到時嫌唔夠重皮都可能仲會加,到時就要再留意會唔會成為利淡因素,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情