《小傳日記》別人笑我太瘋癲，我笑他人看不穿。喺名創優品（０９８９６）宣布以接近６３億人仔入主神州超市品牌永輝超市（滬：６０１９３３）之後，創辦人葉國富就喺朋友圈表示，「大家都看不懂就對了，如果都看得懂我就沒有機會了」。最後名創今日大跌差唔多兩成半，先唔講睇唔睇得穿，但今年低位就已經跌穿。　　名創重磅公布收購永輝超市股權，包括向京東（０９６１８）兩間全資附屬收購約３﹒６７億股，佔８﹒３１％股權，斥資大約１７﹒７４億人仔；以及向最大股東牛奶公司收購約１９﹒１３億股，佔２１﹒０８％股權，斥資大約４４﹒９６億人仔，最終名創優品持股永輝２９﹒４％，成為最大股東。但係名創ＣＦＯ張靖京就提到，公司預計唔會控制永輝董事會多數席位，所以公司唔會成為永輝控股股東兼實控人，亦唔會合併財務報表，「這是根據目前的情況做出的判斷」。　　截至今年６月底，名創持有現金６２﹒３３億人仔，即係今次撈底永輝超市已經用盡所有現錢，令孖屐詐曬型，有錢唔加派息都算，仲攞嚟大花筒買間盈利倒退嘅線下超市！係人都知撈底一係博到一係博唔到，名創６３億入局唔被睇好嘅傳統零售行業，令公司後市風險劇增，正正係今日捱沽嘅最大原因。　　對於孖屐嘅大惑不解，葉國富都有嘗試解釋一吓，一切都由一嚿番薯講起。自從永輝伸手向胖東來求救，胖東來模式就進駐永輝，葉國富曾經喺胖東來買過一嚿燒番薯，喺嗰一刻「深深的感動」，自此心入面就燃起對於線下超市嘅無窮幻想。佢覺得，永輝當日願意接受胖東來模式，高度改變日常營運模式，呢一種求變嘅能力正正係永輝不斷進步的基礎，加上引入胖東來無微不至嘅以人為本模式，將會喺未來持續發揮作用。　　其實名創本身都係一間「把握機會」嘅公司，由最初山寨疑雲到而家「學習」泡泡瑪特（０９９９２）嘅盲盒出海策略，無一次唔係打破緊自己嘅常規，如今喺零售寒冬入局實體零售，都未嘗唔係再一次打破常規嘅求變。如今永輝股價處於歷史低位附近，如果永輝嘅求變真係一如葉國富所講咁值錢，咁呢次撈底都係值得。　　名創中期業績提到，「將著眼於滲透至低線城市，同時著力深耕發達城市」，相信呢一點就係除咗「感動嘅燒番薯」以外、永輝所吸引到葉國富嘅地方。永輝旗下唔同品牌合共喺全國有大約８５０間門市，遍布２５個省份以及直轄市，名創想一次過增加門市，買一個永輝就相當於多咗８５０間分店。葉國富提到，目前永輝擁有龐大業務規模，穩健嘅現金流亦被市場非常低估，收購後將會為為名創嘅增擎之一。一句到尾，搵到錢咪得，而家最怕就係你豪賭撈底之後，搵唔得返本啫，賭贏就零售大佬，賭輸就接盤傻佬，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】etnet全新頻道盛大推出！全港最齊盛事活動資訊盡在掌握！► 即睇