《魚缸博客》小米（０１８１０）隔晚公布業績，截至９月底止第三季純利為５３﹒５２億元人幣，按年升９﹒８％，非國際財務報告會計準則計量，經調整淨利潤６２﹒５２億元人幣，按年增４﹒４％，勝預期。期內，收入按年增３０﹒５％至９２５億元人幣，亦勝預期。　　　小米算唔算業績好呢？絕對好，手機業務喺中低端市場佔有率穩定，已經做到「又平又靚又正」，咁毛利率點解壓低呢？好明顯，係中美貿易問題令晶片成本提高，目前小米用緊高通３ｎｍ晶片，有傳小米自研晶片已經有盼頭，但一日未成功都唔敢亂講，唔怕被人制裁咩。　　　另一方面，「蘇７」（ＳＵ７）嘅成功都係公司業績亮點之一，公司已經提前完成十萬輛車交付，全年新目標係１３萬輛。雖然坊間對於呢架車仲有好多批評，但電車來講，Ｕｌｔｒａ版可以跑到３５０公里確實「大癲」；而平民入門版都係２０萬人仔，以「電跑」來講算係性架比超高，但質量可以再改進。　　　你會問，點解出左業績，股價都唔上？大佬啊，你唔好咁癡線啦，你睇下小米個股價，由今年８月都係１５蚊，炒到而家接近３０蚊啦！出左業績，早兩個月入貨個班仲唔套現食糊咩！　　　咁小米股價仲有無得上？基本上炒ＳＵ７交付量呢個消息已經接近尾水，往後再上似乎跟大市關係比較多，所以入唔入手，視乎你有幾睇好個市囉。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇