近期車股走勢回升，連之前一路唱淡Tesla嘅德銀都改口，話特斯拉由於自動駕駛和人形機械人業務的潛力，值得「獨特嘅溢價」，前面呢幾句都係三幅被啦，最重要都係恢復「買入」評級，調轉頭唱好。博客都非常認同德銀轉舵，所以今日都睇中隻吉利(00175)。
　　吉利控股旗下極越噚晚就發布極越07，同百度(09888)合作研發AI能力，投入超1700億人幣，更選用總投入超700億元的寧德時代高性能動力電池，極越07可以話係集各家之大成嘅重磅車款。
　　三款車型限時購車優惠價為19.99萬人幣至28.99萬人幣，當中標準版CLTC續航里程為660公里，長續航版CLTC最大續航880公里，搭載雙電機四驅系統的性能版零百加速3.5s，CLTC續航里程770公里，充電10分鐘補充600公里。吉利控股董事長李書福拍片為極越07背書，提到極越汽車使用業界領先的SEA智慧進化體驗架構，品質可靠；又指極越07「很漂亮、很聰明」。
　　雖然極越並唔係直接同吉利汽車有關，但都有望借著個勢炒上，今日吉利低開，但正好喺250天之上，隨後一路回升更加掂過9銀高位，半日已經成交1.86億銀，全日大有機會高過噚日嘅2.06億銀。如果今日收市價高過噚日開市價8.88銀，就會形成類似破腳穿頭嘅利好形態，後市要破9銀阻力就無咁難，短線先望挑戰9.8銀，收穿250天線就要走先喇！

《編者按》本欄搜羅即市傳聞，惟消息未經證實，《經濟通》亦不保證內容之準確性。

當國家領土變成可交易商品，世界會變成點？即刻投票發表你對「購島論」的睇法。► 立即投票