《開市Ｇｏｏｄ　Ｍｏｒｎｉｎｇ》香江魚缸６月開局聲勢凌厲，日內曾升近５００點，高位１８５７３點，不過仲未有力修復十天線。最終收升３２３點，收報１８４０３點，成交大增至１３２３億銀。點解今日個市表現咁好，就要歸功於騰訊（００７００）呢隻升市功臣，多得企鵝澄清「微信支付被要求降低市場份額」謠言；另外又有新能源車股５月交付量出爐，齊齊拉升魚缸為６月開個靚頭。另外，神州公布埋５月財新製造業採購經理指數升０﹒３至５１﹒７，唔止好過預期，仲係近兩年來最快增速。不過《彭博》就直指數據「有水份」，主要因「季節性調整」令數據失真，黃師傅又點睇？　　至於賭城公布上月最新賭收，按月升近９巴仙至逾２０１億澳門元，按年就有近三成升幅；局方解釋升幅係受惠於神州五一黃金周所帶動，但神州下一個長假期已經要等到第三季尾嘅中秋、國慶長假期，神州自由行（ＩＶＳ）計劃擴展又幫唔幫到托住賭收呢？觀乎各濠賭股股價及市佔率，似乎美高梅（０２２８２）同永利（０１１２８）有追落後勢頭，反映行業洗牌潮已開始？以未來投資價值而言，行業龍頭金沙（０１９２８）同銀娛（０００２７）難再有增值空間？　　教育股大多已公布第一季成績表，唔少都見到有盈利改善，甚至可扭虧為盈，加上政策利好釋放，教育板塊終迎來曙光？不過大前提係要教育之企業維持到改善勢頭先得，而家行業復甦能力係點？不過即使話行業復甦，都未代表係值得投資的時機？仲要睇實咩指標性條件？　　聽日（４日）《開市Ｇｏｏｄ　Ｍｏｒｎｉｎｇ》搵嚟輝立證券董事黃瑋傑，同大家分析上述股份及大市走勢！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝ｏＱｗ２ｌａｐ－ｎｊＥ打個卡先又得！

想要獨家投資理財Tips？即Like etnet 全新Facebook專頁► 立即讚好