《魚缸博客》今日魚缸繼續跌，恒指跌緊３００幾點，Ａ仔場一樣無運行，上證指數跌約１％。內需股繼續衰，農夫山泉（０９６３３）都跌約３巴仙，雖然跌幅喺今日來講唔算大，但股價低見２５﹒６０銀，創上市新低。除咗因為內需疲弱，農夫今年正值多事之秋，所以，股價創新低並唔意外。不過，今日唔講農夫住，講一講佢嘅老對手娃哈哈。　　同農夫一樣，娃哈哈今年同樣係多事之秋。近日有內媒報道指，娃哈哈集團要求員工重新簽署勞動合約、以較低價格回收員工持股股權，令職工權益受損害，於是發起維權會，向娃哈哈集團提出法律訴訟。報道又提到，有娃哈哈員工勞動合約被要求改簽宏勝飲料集團，同時，娃哈哈集團旗下杭州蕭山順發食品包裝有限公司近日發生股權變更，更影響了娃哈哈集團員工切身投資收益，因為工會之前亦係蕭山順發嘅重要股東之一。　　不過，娃哈哈集團就發聲明，指上述通報嚴重失實，對杭州娃哈哈集團有限公司工會聯合會委員會名譽造成極大損害。並指出工會從未聽過「娃哈哈維權委員會」相關訊息，目前工會亦未收到所謂「娃哈哈維權委員會」提起嘅訴訟。據工會了解，杭州娃哈哈集團有限公司員工持股會嘅內部股份回購事宜，經過會員代表大會全體決議通過，相關協議由持股會會員自願簽署，合法有效，不存在損害持股會會員利益。至於蕭山順發股權轉讓問題，據工會了解，是蕭山順發正常股東變更，股權轉讓合法有效，符合相關法律法規，並經工商部門審核確認，並無外界揣測特殊原因。娃哈哈表示，目前工會嘅管理及工作秩序一切正常。誰對誰錯，真係一時三刻說不清。　　自從娃哈哈創辦人宗慶后離世後，娃哈哈開始進入媒體焦點，雖然同農夫山泉嘅恩怨，輿論企喺娃哈哈一邊，令娃哈哈銷量一度急升。但到７月中，宗慶后繼承人宗馥莉突然發公開信，表示因為管理能力受到大股東質疑，致使無法履行管理職責，於是辭任集團副董事長、總經理職務，並不再參加其經營管理。消息傳出後，市場議論紛紛。正當市場仲熱議緊宗馥莉點解要離職時，件事又出現戲劇性轉機。事隔短短一個星期，娃哈哈喺７月２２日晚發聲明指，為確保公司平穩健康發展，經各股東友好協商，宗馥莉女士決定繼續履行娃哈哈集團相關管理職責。　　一連串事件，外人難以猜測因由。不過，可以肯定嘅係，兩間水企今年都話題多多。或者因為今年係龍年，龍年自然離唔開水，唔單止神州大地雨水充盛，仲搞到兩間水企龍年是非多多，唔單止要打水戰（降價），仲要打埋口水戰。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇