《小傳日記》農夫山泉（０９６３３）今日股價繼續下跌，最多曾插水逾８％。據內媒報道，農夫山泉桶裝水提價，大桶水入貨價由１５元人民幣至１８元人民幣，加幅達２０％。據報此舉將導致唔少單量小「散戶」水站利潤遭壓薄。個別水商表示，加價後將「徹底不賣農夫山泉」，未來將只賣娃哈哈、怡寶、雀巢、康師傅等品牌。　　內地今年面臨零售疲弱，消費降級嘅問題。好多產品都減價促銷。如果傳言農夫桶裝水加價屬實，到底佢憑乜嘢喺咁嘅環境下逆市加價？唔通係因為消委會早前將農夫山泉水嘅評級由４﹒５星上調至５星？如果係咁，怕且係農夫山泉嘅一廂情願。消委會喺檢測之後，曾經畀機會佢地解釋，結果佢地無解釋清楚。等人地報告公布後，先來發爛渣，又出律師信又要求道歉，其戰狼形象表露無遺。至於質量，唔通消費者會因為上調５星而覺得佢哋質量好咗？　　農夫山泉今年是非纏身，先有宗慶后離世，引起消費者要杯葛農夫山泉水；後有旗下綠茶飲料包裝疑含有「媚日元素」，再一次被推上風口浪尖。上周香港消委會發律師信要求消委會道歉一事，再一次成為焦點。但同對上兩次唔同，今次係佢地將自己推向輿論漩渦。事件雖以消委會致歉終結，但事件對品牌嘅影響有幾大，暫時難以估計。　　除咗農夫山泉，內地另一個知名水企娃哈哈最近同樣引起關注。話說上周四（１８日）內地社交平台上周流傳娃哈哈集團副董事長、總經理宗馥莉嘅簽名辭職信。內容提及「娃哈哈集團部分股東，自宗慶後董事長離世後，對娃哈哈集團經營管理的合理性提出質疑，使其無法繼續履行對集團及其持股公司的管理職責，因此決定自１５日起辭去娃哈哈集團副董事長、總經理職務。」　　按照股權分布，娃哈哈嘅第一大股東係杭州國資委，持股比例４６％。而宗慶後與娃哈哈集團基層工會分別持股２９﹒４％和２４﹒６％，亦即係話宗家持股不足三成。當大家都以為宗家喺娃哈哈集團嘅影響力，將隨宗慶后嘅離去而消失時。事情卻峰回路轉。２２號晚，娃哈哈集團發出正式聲明稱，「為確保公司的平穩健康發展，經各股東友好協商，宗馥莉決定繼續履行娃哈哈集團的相關管理職責。」　　雖然網上有猜測話，今次係宗馥莉以退為進嘅一次勝利。筆者無意多加猜測，但可以肯定嘅係，宗馥莉背後的確有「靠山」，呢個「靠山」就係消費者。從年初消費者為宗慶后「抱不平」而要杯葛農夫山泉時，可以睇得出內地消費者對宗慶后嘅情感非同一般，呢點相信娃哈哈其他股東都睇到。一旦無咗宗家，娃哈哈對消費者來講，可能就好似其他水企一樣，可有可無。　　俗語話「水能載舟，亦能覆舟」。不過，喺自由經濟市場下，載舟與覆舟嘅唔係水，而係消費者。所以，企業同品牌喺消費者心中嘅形象至關重要，呢樣嘢係戰狼式企業唔會明白嘅道理。要得到消費者嘅長持信賴同支持，單靠咄咄逼人嘅態度係遠遠唔夠嘅！請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好