29/05/2024 16:31
《小傳日記》領展業績靚仔舊年供股應記一功,派息少但回報率高咗
《小傳日記》領展(00823)今日中午公布,截至今年3月底止全年度,收益及物業收入淨額分別按年增11﹒0%及9﹒5%至135﹒78億元及100﹒7億元,主要來自2023年3月收購嘅新加坡資產,以及於上一個財政年度完成收購澳洲及中國內地物業之全年貢獻。於2024年3月31日,香港零售物業出租率高達98%,平均每月每平方呎租金錄得0﹒9%增幅。此外,整體平均續租租金調整率維持按年增長的勢頭,上升至7﹒9%, 領展同時公布,年度末期每基金單位分派132﹒57仙,按年增11﹒6%,連同中期每基金單位分派130﹒08仙,全年每基金單位分派跌4﹒3%至262﹒65仙。 業績公布後,股價即刻升到嘭嘭聲,最多升半成。梗係啦,條數靚靚仔仔,的確有啲出乎意料。香港自從舊年復常以來,港人唔係報復式外遊,就係北上消費,搞到本地零售業一潭死水,周街吉舖,就算間鋪租得出,都可能要減租成交。所以,市場對領展今次業績都唔敢抱太大期望。結果一出,無論總收益定係平均呎租都有增長,其實,無論增幅多少,只要唔使跌其實已經有交代了! 記得舊年供股消息傳出後,領展股價應聲下跌,對於投資者來講,當然係一個壞消息,但作為企業,利益慢慢就會浮現。試諗下,當時供股得來嘅大約185億元,除咗還債減少利息開支之外。亦可以作為收購項目之用,吓吓問銀行借,喺而家利率高企嘅環境下,每年淨係利息開支都俾唔少。講返轉頭,今次業績咁靚,舊年供股應記一功。 今日業績公布後,唔少媒體都以全年少派4%股息作標題。雖然無錯,但係有啲帶錯方向。睇返舊年5月29日股價,當時做緊大約45﹒21元(除淨後),現價比起嗰時已經跌咗兩成幾,而派息只係比舊年少咗4%。換言之,息率提高咗。以現價34﹒7元計,息率有成約7﹒6厘;而舊年同期,息率僅有約6﹒1厘,邊個好,你話呢? 領展股價4月跌至30﹒15元見底反彈,升至37﹒7元後回調。近呢幾日喺30元附近企穩,相信大家都喺度等緊派成績表。而家成績亮麗,相信短期內股價都有支持,買入當收息制得過!請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票