《小傳日記》自稱香江品牌、實則碰瓷美心嘅美誠月餅，喺呢個中秋炒到㷫烚烚，可惜帶嚟嘅只係負面流量。網傳有老闆睇完直播，訂咗十幾盒美誠月餅諗住送畀員工，結果發現係貼牌貨，唔敢派出去。早兩日捲入事件嘅ＴＶＢ（００５１１）總經理曾志偉，此前出席港姐決賽後接受行家訪問，初頭講幾句賽後點評都無事，一有行家提起「月餅」兩個字，曾總經理即時遞咪速撇，就知呢個餅真係惡啃。　　其實ＴＶＢ一直都有個電商夢，但過去一向專注傳統電視業務，要迎合時代變化轉型確實唔易撈。今次總經理曾志偉以個人名義玩直播試賣月餅，斷估都唔係秘撈啦，某程度上係幫ＴＶＢ做陣前卒，試吓涉獵抖音直播帶貨嘅可能性。雖然今次撻Ｑ，但都只係曾志偉個人聲譽啫，未至於去到公司層面，公關危機可防可控。　　ＴＶＢ由以前余詠珊打骰年代就開始涉獵電商，當時就係以ｂｉｇ　ｂｉｇ　ｓｈｏｐ名義，但行得唔係好順，業績無乜起色，隨後曾志偉回朝，余詠珊疑似被問責敗走後，ｂｉｇ　ｂｉｇ　ｓｈｏｐ就同後來收購返嚟嘅「士多」合併成為而家嘅「鄰住買」，之不過「鄰住買」並唔好得過ｂｉｇ　ｂｉｇ　ｓｈｏｐ幾多，從ＴＶＢ中期績見到，其「電子商貿業務」收入按年大減７５％，到得返大約６８００萬銀，ＴＶＢ表明係因為「零售市場持續面臨結構性挑戰」，所以主動縮減電商業務規模，而就算計ＥＢＩＴＤＡ都只能按年收窄虧損大約一成，變相即係仲未賺錢。　　由電視台跨步落去電商呢步係有啲闊，除非好似王維基咁被迫瞓身由電視轉搞電商，如果唔係就會好似而家咁兩頭唔到岸，而即使「瞓身搞電商」亦唔見得有幾掂，ＨＫＴＶｍａｌｌ（０１１３７）今年上半年仲要轉蝕２７００幾萬。　　所以ＴＶＢ藉住自己尚存嘅影響力，轉搞直播電商應該有搞頭，始終廣播都係主業，而直播更加係曾志偉主項，但網絡世界玩法完全唔同，ＴＶＢ要摸著石頭過河，弊在今次摸唔到石頭，摸到三隻羊。　　早喺上年３月，ＴＶＢ曾經高調宣布同淘寶合作直播，股價幾日內由唔夠４銀暴升上過１７﹒９銀。當時除咗由贏過直播真人ｓｈｏｗ嘅陳敏之擔綱，更加連台柱陳豪都出動帶貨，單日做到２６４５萬銀銷售額，成績算唔錯。當時陳豪用自己演過嘅經典角色幫手賣鮑魚海味同化妝品，其實係為ＴＶＢ開咗一條其他公司模仿唔到嘅直播帶貨好橋，但呢次只係初試啼聲，真係落到袋嘅唔算好多。ＴＶＢ將直播收入放落去「中國內地業務」分部，今次中期績分部收入按年多２２％去到３﹒８３億銀，分部ＥＢＩＴＤＡ虧轉賺大約４５００萬，初嚐甜頭之後就預計今年下半年直播業務收入會進一步提升，但偏偏今次曾志偉首戰就跣鑊甘。　　眾所周知直播電商條路唔易行，東方甄選（０１７９７）至今仲未逃出茶杯裏的風波，樹欲靜而風不息，今次美誠月餅事件足證帶貨嘅風險有幾巨大，就算係頂流小楊哥都會面臨滅頂之災，ＴＶＢ要玩流量變現，睇怕要再畀多啲學費，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

第九屆「傳媒轉型大獎」請投etnet經濟通一票！► 立即行動