《小傳日記》神州市場各行各業都要應付內捲，當然內需零售市場都避唔得過而捲。而被持續睇淡嘅農夫山泉（０９６３３），難得喺今個夏天搵到「新水源」，但都係難逃被打殘嘅命運，搞到今日最多跌過５％，成交成９億銀！　　夏日熱辣辣，就當然想「喝一杯凍檸檬茶」，今個夏天神州就反而唔興買凍飲，反而係買冰杯。雖然神州杯裝嘢飲都唔貴，但更平嘅方法就係買樽裝飲品再加冰。所以神州超市同便利店就開始有冰杯賣，即係杯裝冰，再由消費者自己揀飲咩倒入去，咁就乜都可以係凍飲。　　作為飲用水龍頭，農夫山泉今個夏天就把握呢個機會賣冰杯，一杯１６０克喺便利店標價４﹒４銀人仔，係今年夏天最熱賣嘅冰杯之一。有人就計過，農夫山泉標準５５０毫升水都係賣兩銀人仔一支，但１６０克冰就賣４﹒４銀，埋起數嚟相當和味。但當然有人都知道賣冰嘅著數，平絕嘅蜜雪冰城稱霸奶茶行業之後就踩到農夫山泉頭上，竟然新出１蚊人仔嘅冰杯，比起農夫山泉冰杯平接近八成！造就今日農夫山泉嘅瀑布式急跌。　　冰杯除咗平過一杯手搖茶之外，喺年輕人之間會大受歡迎嘅原因仲因為可以ＤＩＹ。而家小紅書上多咗好多教人點樣用冰杯ＤＩＹ嘢飲，梳打、茶、果汁、咖啡、益力多等等，隨便任溝就好似玩緊雞尾酒大賽，日日飲都可以有唔同口味，又平又好玩相信就係今年夏天冰杯熱買嘅主要原因。　　冰杯嘅興起其實對於茶飲股係最大影響，當然蜜雪冰城係應變最快嘅龍頭，即時平價推冰杯，起碼先搶返一部分顧客先算，同時打擊農夫山泉。以１蚊價錢賣冰，計落條數可能真係未必賺到錢，但搶返市佔呢點嚟講的確係有作為，就睇今日農夫山泉仆直就知一定唔會無料到，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇