24/04/2024 16:15
《小傳日記》新股首掛接連破發,係信心問題定係質素問題?
《小傳日記》正所謂「有人辭官歸故里,有人漏夜趕科場」,股市亦一樣。之前有魏橋紡織成功退市。另外,中集車輛(01839)、中國中藥(00570)、新秀麗(01910)和歐舒丹(00973)等多家公司,甚至連李寧(02331)都傳過話私有化。不過,你有你退市,我有我上市。 尋日有兩隻新股上市,包括茶百道(02555)同埋天津建發(02515),雖然兩隻新股做嘅瓣數唔同,但上市首日嘅命運就一樣--跌破上市價。今日挂牌嘅出門問問(02438)挾住公開發售獲超額認購過百倍嘅威勢,開市一樣都要比上市價低兩成,收市跌少咗,投資者都唔使蝕咁多。整體來講,近日認購新股無著數。不過,有無著數都好,有多D新股上市始終係好事,起碼俾投資者多一個選擇。 講起新股上市,不得不提TOM集團(02383,前稱TOM﹒COM)2000年招股時嘅瘋狂程度。當年認購新股需要親身交表,即使係咁,依然吸引幾十萬人排隊。銀行外人頭湧湧,超額認購達669倍,風頭一時無兩。當年招股時一表難求,有傳媒報道,首日印發50萬份申請表仍然唔夠派。因此出現「黃牛」炒表格,原本免費嘅申請表,叫價高達100蚊一份,可見當時嘅瘋狂程度。有電視媒體訪問排隊認購嘅阿婆,知唔知自己申請緊乜嘢股票,隻股票好唔好之類問題。嗰位阿婆話:「梗係知道啦!咪就係湯篤金囉,老細係超人呀嗎。聽人講,一定有錢賺,我咪來囉。」個阿婆又錯唔曬,隻股票首日掛牌,股價升幅達4﹒8倍。但掛牌6日後股價於15﹒35元見頂,其後一季狂跌七成,見證科網泡沫爆破嘅時代。 當年抽新股嘅盛況早已不復存在。呢兩年新股上市無聲無息,幾乎無人知。又難怪嘅!港股呢幾年無運行,莫講話新股,恒指都已經連跌幾年,跑輸全球幾個重要股市。指數方面輸俾台灣加權指數,市值又輸俾印度股市。港股之中唔少藍籌股市盈率跌到單位數,估值明顯偏低,呢個或者就係部分上市企業選擇退市嘅原因之一。 如果上市得不到一個合理的估值,試問邊個願意急住上?因此,部分高質素,又有實力嘅企業寧可延遲上市,等待更好嘅時機再來。難怪近期少咗重量級嘅新股上市!昔日新股集資額稱霸全球嘅香港,今年首季新股集資額更退居全球第十位。再咁落去唔係辦法。好彩,恒指今日已經連升第三日,並且見今年高位(17217)。希望指數繼續升,吸引更多有質素嘅新股來上市,到時就皆大歡喜!請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票