26/07/2024 17:06
《小傳日記》東方甄選果然出事!不過告別董宇輝先係重生嘅開始?
《小傳日記》前腳講完東方甄選(01797)太耐無出事,後腳就即刻出大事,果然喺招惹是非方面唔會令人失望;原來搬總部「自立門戶」只係前菜,董宇輝離職真正「自立門戶」先係真正嘅辣味主菜。 噚晚六點東方甄選放出震撼彈,經過一場又一場風波之後,都係逃唔過台柱董宇輝最終離巢嘅命運。通告入面解釋:「該離任乃由於董宇輝的職業抱負、對其他事業的投入及個人時間安排」。同時東方甄選正式公告「與輝同行」將以大約7658萬人仔出售全部股權予董宇輝,換句話講係連人帶公司一次過剝離,乾乾淨淨。 雖然話係「賣」畀董宇輝,但公告後俞敏洪即時上水回應,出咗篇《致東方甄選股東朋友的一封公開信》,入面提到為咗向董宇輝表示感謝,除咗已經支付承諾嘅全部待遇之外,仲會將與輝同行嘅全部淨利獎勵都畀董宇輝。俞老闆更加喺抖音評論區強調,董宇輝買與輝同行嘅錢「早已安排,公司是送給他的」。 自上年「小作文」以來,東方甄選就一路是非纏身,差唔多次次都係董宇輝啲丈母娘為佢抱不平而引發嘅爭議,期間仲令前CEO孫東旭慘成炮灰敗走。喺最新呢份公開信入面,俞敏洪都唔轉彎抹角,提到東方甄選身為互聯網企業,輿論力量經常都會影響到公司發展,都直接令東方甄選同與輝同行有所隔閡。為避免業務衝突和輿論糾葛,最後都係咁嘅決定。 呢個消息震撼,但其實唔意外。之前都提過是是非非的而且確影響緊東方甄選個價,如今的確係可以令俞老闆可以過返啲好日子,唔使日日走出嚟道歉。不過俞老闆本人有好日子過,唔代表東方甄選有好日子過。大和就今次董宇輝散水一事出報告,提到與輝同行佔東方甄選所有直播頻道總GMV嘅接近一半,預計董宇輝嘅離任將會為東方甄選下一年帶來14%至18%嘅負面影響,對盈利方面更加有25%至40%負面影響。大和認為,分手之後與輝同行由親生仔變成對手,未來仲會面對來自與輝同行嘅的競爭和輿論壓力,所以就將2025財年同2026財年嘅盈利預測大降54%同58%,評級直接由「持有」掟落「跑輸大市」,目標價由29銀大劈六成去11銀。 與其話同董宇輝分手係「長痛不如短痛」,更貼切嘅講法應該係「痛定思痛」。既然留佢喺度會是非纏身影響股價,唔留喺度又會業績差咗影響股價,倒不如引刀成一快,摒棄繼續依賴董宇輝嘅經營模式,重新搵過新嘅賺錢引擎,先係一間企業合理嘅發展模式。雖然無可避免眼下係會賺少好多,但反而可以鞭策出一條新嘅路。俞敏洪經歷「教育雙減」都可以浴火重生,今次呢關唔通又會難得過上次?請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇