06/03/2024 17:08
《小傳日記》谷創新藥都係為救藥明?甚至有利內循環提升?
《小傳日記》兩會舉行當中,暫時消息面上偏向平淡,總理李強發表嘅政府工作報告,要有嘅都仲有,不過對於孖屐嚟講就無咩料到,所以都難炒些少。有孖屐中人就話,料就唔係無,不過好難橫空一個大政策出嚟就推升魚缸,而要逐樣消息慢慢搵,總會搵到啲蛛絲馬跡嚟炒。 醫藥股今日又升過,之前升咗一浸,噚日回一回,但係今日就再有錢追入,比起之前跌幾日先彈一日,如今有升有跌都算係健康得多。其實都唔係無消息支持,喺工作報告入面,總理就提到要「加速前沿新興氫能、新材料、創新藥等產業發展,積極打造生物製造」,就係一句,被孖屐發現到喺工作報告第一次提到「創新藥」呢個字眼,並唔單止係提到「生物醫藥」,被解讀為扶持創新藥嘅先兆,所以今日除咗一眾新藥研發股之外,CXO概念嘅藥明系都炒起,藥明生物(02269)全日升足差唔多一成。 其實阿爺要谷一谷「創新藥」呢個字都無可厚非,最大原因就係平衡返個氣氛。如今係美國大選年,美國再有風吹草動要以打壓中國生科為籌碼拉票,藥明系早排可以話係雞毛鴨血。所以阿爺都要吹返轉頭,指明針對「創新藥」,對於做CXO嘅藥明系就自然係一大支持。 谷創新藥其實都算係內循環嘅一環,如今每逢美國有打壓,藥明都會例牌大跌,主要就係因為美國業務重,每每都成為藥明嘅痛腳,如果神州境內研發氣氛加大,對於藥明等等嘅CXO需求都會提升。 創新藥之中,最當炒就係治癌概念,免疫療法就係醫藥市場嘅焦點,透過連接因子將具有生物活性嘅小分子藥物偶聯至單株抗體上而產生,激活自身抗體對抗癌細胞,就係而家炒緊嘅生物偶聯最基本概念。而唔炒專做呢方面嘅藥股都已經漸漸成為魚缸醫藥板塊嘅重心,好似信達(01801)、百濟神州(06160)、康方(09926)同金斯瑞(01548)等等,都喺呢兩年入面逐漸展現身價。 如果未來阿爺要谷創新藥,除咗加大對研發新藥嘅投資,另一個要點就係搵到買家。藥好都要有人買,但唔夠好就無人買。好似之前嘅新冠疫苗一樣,做咗出嚟但係無人買都係得不償失,既要好藥,亦要買家,要谷起唔容易,但谷得起就潛力無限,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】本港無人駕駛自動車最快本月底試運,你會否乘坐?► 立即投票