《小傳日記》車股今年以來都係處於捱打狀態，新車賣貴少少都會被孖屐質疑可唔可以喺減價戰生存。但係大佬ＢＹＤ（０１２１１）就呢個時勢發有新系統技術，而應用咗新技術新車竟然超抵價發售，令呢隻大牛龜噚日都久違地大彈５％。　　ＢＹＤ　２８號晚舉行發布會，發布第五代ＤＭ－ｉ技術，同時推出兩款具備ＤＭ－ｉ嘅新版插混車型，秦Ｌ　ＤＭ－ｉ同海豹０６　ＤＭ－ｉ，標價只係９﹒９８萬銀（人仔．下同）至１３﹒９８萬銀，全新技術但係就賣得咁平，單睇牌面已經好吸引，就要係龍頭ＢＹＤ出嘅新車。　　講返呢個ＤＭ－ｉ技術，「ＤＭ」係「Ｄｕａｌ　Ｍｏｄｅ」，即係「雙模插電式混合動力技術」，原理係運用雙電機串並聯架構，兩部電機一部用作驅動，另一部就用作發電同啟動發動機，而兩部機嘅運作都比較獨立，令架車行駛時候更多情況會依賴電動，從而提高效率並且減低油耗，所以電池容量會更大，而且電機效率更高，續航能力亦都更強。ＢＹＤ就提到，第五代ＤＭ技術可以實現全球最低百公里虧電油耗２﹒９Ｌ同全球最長綜合續航２１００公里，油耗只有燃油車嘅三分之一，綜合續航更加係燃油車的三倍。　　講到咁犀利，但兩款新車最平１０萬銀有找就可以買到，對於銷量係好事，但毛利有幾高就要再睇，始終開發技術都有成本，新技術反而賣得平，後續都好睇呢個新技術嘅變現能力究竟有幾高。如今車股除咗技術方面，慳皮都係一大目標，始終減價戰係以本傷人，實力夠強先可以留得青山在，ＢＹＤ都係實力夠勁，先可以做到咁平。以呢個價錢嚟講，後續再減價空間應該唔大，所以好大可能只會有加無減。　　今次兩款車預期反應都應該唔會太差，只係睇會唔會同孖屐預期有落差，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

夏日中暑高風險！即睇中暑迷思＋預防措施！► 立即了解