《魚缸博客》快手（０１０２４）喺７月６號嘅２０２４世界人工智慧大會期間，舉辦以「新ＡＩ．新應用．新生態」為主題嘅大模型論壇，同業內專家一齊探討大模型領域發布趨勢，同時面向行業發布視頻大模型可靈　ＡＩ、文生圖大模型可圖最新動態。　　快手喺大模型技術同應用創新上持續突破，重磅打造快意、可靈、可圖快手大模型家族，仲將生成式人工智慧同快手豐富嘅業務場景、業務形態進行深度結合，致力於為用戶提供更領先、智慧、高效嘅ＡＩ體驗。其中，喺視聽藝術同前沿科技交匯點嘅ＡＩＧＣ微短劇，已經取得實質進展同階段性成果。　　發展形勢看似一片大好，但快手股價自５月高位６３﹒３５銀附近持續下跌，至上周五（５日）低見４３﹒５０銀，短短兩個月股價唔見咗２０銀，跌幅超過三成。以一隻市值約２千億嘅科技股來講，真係有啲跌過籠。所謂屋漏兼逢連夜雨，股價已經跌足兩個月，點知幾間大行仲驚佢死唔去，齊齊伸多一腳，下調快手目標價超過一成。　　不過，快手股價今日逆市上升，最高曾升近３﹒５％至４６﹒２銀。該股４月喺低位４４銀附近開始一波大反彈，不足一個月內累積升超過四成。近日喺４３﹒５銀同４月低位形成一個小雙底格局。係唔係可以借鑒上次經驗，又來炒一波？從技術層面上睇，的確博得過。不過，要留意４月嗰次大市飆升，主要係受到內地與香港資本市場合作政策影響。　　近日大市氣氛轉差，就算快手股價可以再次反彈，都唔好奢望好似上次咁彈得咁高。另外，幾間大行調低目標價，最低嘅中銀國際更只俾６０元。多間大行同時唱淡，情況唔可以忽視，因此，唔排除股價仍有上落。穩陣型投資者可以先觀望，進取投資者可以考慮先喺４５元落一注，待股價整固後，再落第二注，目標價５８﹒５元，４１元止蝕。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇