27/05/2024 16:59
《小傳日記》三千億大基金三期登場!廣東會係晶片發展主場?
《小傳日記》今日下晝,有媒體報道年初傳嘅「大基金三期」終於正式成立,所以魚缸下晝拉升200幾點,並唔單單係因為垃圾徵費暫緩咁簡單。 下晝起內媒報道,據神州商業查詢平台《天眼查》資料顯示,孖屐簡稱「大基金」嘅國家集成電路產業投資基金成立,註冊資本高達3440億銀(人仔.下同),比起第一期嘅1387億銀同2000億銀嘅總和仲要高。今年3月《彭博》引述消息報道估計「大基金三期」規模大約2000億銀,如今即係比預期仲要大多七成。 話明係「大基金」,股東名單方面粒粒星,19位股東入面頭三位股東分別係財政部(出資600億銀,持股17﹒4%)、國開金融(出資360億銀,持股10﹒5%)同上海國盛(出資300億銀,持股8﹒7%%),之後就係四大銀行人人有份,每人出資215億銀,各持股6﹒3%。值得留意係,除咗上述大股東,其餘股東入面都不乏粵企嘅身影,譬如深圳鯤鵬(出資170億銀,持股4﹒9%)、廣州產業投資(出資90億銀,持股2﹒6%)同華潤投資(出資50億銀,持股1﹒5%)。以深圳係科技重鎮嘅地位,「大基金三期」嘅粵企參與度都好難唔令人憧憬主要投資地點將會位於廣東。 過去「大基金一期」主要投資晶圓製造,推動自主生產;到「二期」除咗繼續支持晶圓製造,亦加強咗生產設備同原材料嘅投資。到今次「三期」,有券商就估計今次基金嘅主力會係支持被美國打壓嘅方面,例如係AI晶片、光刻機等等,全部都「自強概念」。 「一期」同「二期」雖然繼續積極投資,但係之前都有報道提到,阿爺對於上兩期嘅投資成效唔係好滿意,晶片產業發展進度並未符合預期。今次「大基金三期」規模咁大,明顯係要應對美國打壓力度加強,過去一年AI發展急劇,亦都令提升神州晶片產能變得更加急切,3000億銀明顯係為晶片戰而做好嘅準備,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票