31/05/2024 17:00
《小傳日記》魚缸5月力保萬八不失!6月打底回升又得唔得?
《小傳日記》魚缸今個月高山低谷,上半個月一往無前,升破18000後連19000都視如無物,一路直到19700。但下半個月終於畀孖屐恨到,個市終於要回,但下半個月以來都係跌跌不休,同上個月比完全係兩種畫風。 魚缸4月底爬升以來成交一路向上,好耐都未見過日日都過千億,令唔少孖屐中人都終於相信外資真係回流。上半月魚缸出現久違嘅暢旺,市升乜都有得炒,去到16號仲創下超過一年嘅最高成交紀錄去到2048億銀,去到20號就見到高位19706!但隨後就一路回吐,10天線、20天線都相繼失守,到今日尾市再被淡友偷襲,差啲連18000都不保,好在最後收報18079,勉強叫喺5月結前守住18000。 政策風向一樣,但魚缸氣氛好唔好已經足以影響消息嘅利好程度。由上個月底開始,內房全面轉吹暖風,全因為上一次政治局會議入面,議程將「去存量房」成為首要解決嘅一項,令孖屐相信今次阿爺終於肯的起心肝救樓市。而之後嘅措施都的確對辦,月中人行就宣布設立3000億銀保障性住房再貸款,容許地方國企收購商品房,用作配售或者配租型保障性住房,帶動內房股全線再炒一輪。但到下半個月市況逆轉之後,雖然連「北上廣深」都宣布下調首套房首付比例,但內房整體都已經炒唔郁,甚至有消息都照跌。 除咗內房之外,阿爺為救魚缸今個月都「再創新猶」,曾經傳出阿爺打算減免港股通股息稅,減免目前北水炒港股收到息之後要畀嘅稅,帶動一堆高息嘅中特估喺月中高位再升一浸!而高息中特估亦包含金礦股同有色金屬股,藉著減免股息稅同國際金屬價格炒高,紫金(02899)、宏橋(01378)之類都喺今個月完成破頂任務。 外圍方面,雖然美國落實對中國進口電動車、光伏產品加徵關稅,但與此同時阿爺亦都重磅出台「大基金三期」,以超過3000億人仔支持最備受美國打壓嘅晶片板塊,再帶動一波晶片自強升勢。而生科方面,月內美國最終都係通過《生物安全法案》,禁止美國企業同中國生科企業合作,但好在禁令適應期長達8年,雖然都係通過,但藥明系總算暫時過一關。 恒指今個月見過高又見過低,今日力保18000不失,「五窮」捱過,「六絕」又到,唔通6月真係要試返次條250天線先有得再升過?請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情