09/07/2024 16:57
《小傳日記》碧桂園一文不值?臨近退市先會被零蚊估值?
《小傳日記》恒指公司上星期二(2號)宣布,因為碧桂園(02007)已經停牌太耐,所以決定將佢剔出所有恒生指數系列,包括綜合行業指數、綜合大型股指數、港股通指數等等大大小小總共八個指數,聽日就正式生效。 事到如今嘅碧桂園已經淪為「人見人棄」系列,碧桂園停牌已久,個個都驚碧桂園隨時有咩風吹草動,隨時得不償失,所以趁呢段時間都慢慢同碧桂園割席。上個月月底,神州其中一間最大嘅綜合基金管理公司匯添富就宣布調整旗下基金所持有資產估值,其中對所持所有碧桂園股份按照0蚊港紙進行估值,係名副其實嘅「一文不值」! 基金將股份估值歸零,通常都係對即將退市嘅股份先會咁做,好似上年陽光城一樣,8月被深交所終止上市地位前就有被基金判斷為0蚊估值,如今碧桂園都去到呢一步,未來會唔會退市都係不得而知,但而家又零蚊估值又被剔出指數,都難免令人擔心碧桂園嘅情況。 碧桂園近期都無咩狀況更新,但係每個月都仲有定期公布營運數據,但5月銷售額就跌76%,6月就跌73%,每個月都按年跌七成,都唔知除咗發債之外仲可以攞咩錢去保交付。無錢難交樓,交唔到樓無人敢買,碧桂園就陷入一個愈來愈拮据嘅境地。 人衰行路打倒扽,碧桂園之前被建滔(00148)旗下Ever Credit追數,追討16億銀未支付定期貸款同利息,向高院提出清盤呈請,6月初開庭後押後聆訊至今個月29號。當時恒大(03333)嘅清盤聆訊都係一再押後,但最終都係要被清盤。碧桂園雖然一直都努力交付,但以每月銷售嚟睇,碧桂園要還債兼交付一定唔及其他行家,近期又無乜消息公布,都難免令孖屐流傳更多風言風語。可能真係要由地方政府出手消化存量房,先係碧桂園嘅出路,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】本港無人駕駛自動車最快本月底試運,你會否乘坐?► 立即投票