《魚缸博客》備受期待嘅國產３Ａ遊戲大作《黑神話：悟空》近期正式上線，隨即喺全球遊戲市場引發熱潮，全平台銷量創下紀錄，聽聞上市首日已經回本。高盛喺最新報告中指出，《黑神話：悟空》嘅面世，對中國主機遊戲行業來講係一個重大轉捩點，係中國遊戲走向全球嘅關鍵一步，或會刺激對中國遊戲行業投資，尤其係３Ａ遊戲。　　只可惜，《黑神話：悟空》嘅成功，對主力做手遊嘅中手游（００３０２）而言利好不大，公司股價今日再創自２０１９年上市以來新低，股價低見０﹒６３銀。　　中手游２０１９年１０月喺港交所掛牌，上市價２﹒８３銀，股價喺２０２１年高峰期曾高見５﹒０９銀。今日股價同高位比，唔見８７％。股價下跌離唔開業績，集團發盈警，預期截至６月３０日止中期虧損唔多於２﹒４３億人仔，而舊年同期純利５１００萬人仔。　　所謂「冰凍三尺非一日之寒」！集團營收自２０２１年達到３９億人仔高峰後，已經逐年下降。舊年營收跌至２６億人仔，短短兩年，唔見咗三分一。若果睇盈利，就更加無眼睇，２０２１年賺緊６億人仔，第二年（２０２２年）就蝕返２億人仔。而家中期就預咗蝕最多２億幾人仔，多過２０２２年全年。發完盈警，集團高層都有出來安撫投資者，話下半年將有多款新遊戲上線產生收益，預料該集團下半年經營業績將有所改善。　　當然，信唔信隨你！但股價跌到咁殘，的確容易令人心郁郁！如果你係長線投資者，即係一揸就可能揸三五年以上嗰啲，或者可以買少少等將來有機會回升。如果係穩陣投資者，可以考慮另一隻網絡遊戲股網易（０９９９９）。網易上星期公布業績，第二季純利按年跌１８％，期內營收按年下跌６﹒１％，所以，股價上星期五都跌一成。不過，網易話曬仲有錢賺，仲有息派，點計都穩陣啲。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇