《小傳日記》香江近兩個月以嚟都風雨飄搖，一眾年青人搞到頭破血流，小傳感到相當心痛！除咗政局不穩之外，工行（０１３９８）同神州信達（０１３５９）向錦州銀行（００４１６）揼水救火，但同時又燃起缸友對神州中小型銀行流動性遲早會出事嘅憂慮，魚缸今朝裂口低開１３４點後不斷潛水，到咗下晝仲一度最多蒸發４５２點兼守唔住二萬八同５０天線（２７９７２點），低見２７９４５點。　　不過，ＱＱ（００７００）今日表現較為硬淨，加上個別藍戰士跌少咗，魚缸冇幾耐就收復返二萬八同５０天線，最終埋單報２８１０６點，蒸發２９１點或超過１巴仙。主板成交６８６﹒２９億銀，較上周五（２６日）輕微增加逾１巴仙。　　國貨方面，全日收報１０７８０，跌７２點或超過半巴仙。　　Ａ場今日兩邊走，上證收報２９４１，跌３點。深成指收報９３５４，升５點，兩市成交３４３７億人仔，同上周五持平。　　重磅藍戰士幾乎全軍盡墨，生發發（００３８８）跌咗超過１巴仙，報２６５蚊。中移動（００９４１）蒸發唔夠半巴仙，報６７﹒２銀。ＡＩＡ（０１２９９）插水近兩巴仙，報８２﹒６銀。ＱＱ就一支獨秀彈起半巴仙，報３７２﹒２銀。　＊政局一團糟零售難復甦，房托首遭殃磚頭亦重傷＊　　　因為反《逃犯修例》而引發嘅一連串示威，加上早排元朗警黑暴力事件，對零售業嘅影響逐漸浮現，部分旺區更加有「吉舖」出現，本地磚頭同收租股今日首當其衝，新世界（０００１７）就跣低近４巴仙，報１１﹒２６銀。港鐵（０００６６）亦都急插超過３巴仙，報５２﹒１銀。太地（０１９７２）插近４巴仙，報２８﹒７銀。恆地（０００１２）同長實（０１１１３）都雙雙唔見咗超過２巴仙，報４１﹒５銀同６１﹒１銀。新地（０００１６）算係硬淨只係跌超過半巴仙，報１２７﹒２銀。　　收租佬方面，九置（０１９９７）全日蒸發近半成，報４８﹒４銀，為表現最差嘅藍戰士！領展（００８２３）急插近３巴仙，報９２﹒３５銀。冠君（０２７７８）跌得最甘，蒸發咗超過４巴仙，報５﹒９銀。置富（００７７８）唔見咗超過１巴仙，報１０﹒３４銀。希慎（０００１４）下滑逾２巴仙，報３８﹒４５銀。鷹君（０００４１）跣低３巴仙，同３２﹒３銀。　＊生意好難撈錢莊佬糟糕，三十億墊底工行表現曳＊　　　擔心樓價未來未必再升嘅時候，一眾做開按揭嘅本地錢莊自然都驚無生意。加上聯儲局就算今個月唔減息，年內都幾大機會減，咁佢哋嘅淨利息收入自然就凍過水啦。雙重夾擊下，今日股價自然唔好睇。其中小象（０００１１）、大新金融（００４４０）、中銀（０２３８８）同大新銀行（０２３５６）就齊齊唔見２巴仙，分別報１９１﹒９銀、３５﹒２５銀、３０﹒５５銀同１３﹒６６銀。今個星期四（１日）放榜嘅渣打（０２８８８）就躂低１巴仙，報６６﹒７銀。東亞（０００２３）亦跌１巴仙，報２２﹒４５銀；大象（００００５）就跌半巴仙，報６３﹒９銀。　　「孖屐」之前一路傳財限嘅錦州銀行終於都有好消息，之前已經講明會包底嘅工行終於講定實數以唔多於３０億人仔入股佢近１１巴仙股權。有大佬照錦州行當然開心啦！不過工行就慘囉，一來「孖屐」驚佢高價接貨，兩來驚佢要接濟其他內銀嘅事陸續有嚟，全日埋單唔見逾２巴仙，報５﹒３９銀；而已經接手包商行嘅建行（００９３９）就再跌１巴仙，報６﹒１３銀；其他街坊都唔知幾時燒到自己，所以都驚埋一份。中行（０３９８８）同農行（０１２８８）都跌１巴仙，分別報３﹒２２銀同３﹒２１銀。郵儲行（０１６５８）就走低２巴仙，報４﹒５２銀；招行（０３９６８）同交行（０３３２８）齊齊唔見１巴仙，分別報３９﹒９５銀同５﹒７２銀。　＊中美又講數中興鐵塔倒，缸友齊走貨孖寶齊下挫＊　　　雖然今個星期花旗國同神州又講數，但「孖屐」都無咩期望。聯通（００７６２）上星期同中興（００７６３）、京信通信（０２３４２）喺宜興陽靈公路隧道，完成咗公路隧道５Ｇ試點試驗，但有關魚毛都無因為咁而踢高，反而都係跟住魚缸軟腳蟹。京信通信劈逾１巴仙，報１﹒４９銀。中興微跌近半巴仙，報２４﹒６銀。聯想（００９９２）跣低逾半巴仙，報６﹒３７銀。鐵塔（００７８８）撻低近１巴仙，報２﹒０７銀。　　同樣受神州同花旗國講數影響嘅手機設備佬，今日就跟隨魚缸畀缸友追住掟。孖寶瑞聲（０２０１８）剎車逾２巴仙，報４３﹒３銀，最低見過４２﹒８５銀，又再失守十天線（約４３﹒９６銀）同廿天線（約４４﹒１４銀）。舜宇（０２３８２）獲美銀美林升「他屐」一成六至１１０蚊，但今日就縮水近１巴仙，報９３﹒０５銀。丘鈦（０１４７８）跣低逾１巴仙，報７﹒７２銀。比亞迪電子（００２８５）撻低逾１巴仙，報１１﹒４２銀。今日有好幾隻Ａ場華為概念股急炒，富智康（０２０３８）股價早排因為獲缸友憧憬可以做更多華為生意而坐火箭之後，今日又再逆市落鑊，彈起半成，報１﹒０５銀。請請！　　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【etnet 30周年】多重慶祝活動一浪接一浪，好禮連環賞！ ► 即睇詳情