11/04/2024 11:50
《小傳日記》京東傳搞短視頻,唔通想製造協同效應?
《小傳日記》內媒報道,接近京東(09618)人士話京東打算投入10億人仔,開拓短視頻市場。作為內地主要電商之一,點解突然摵起條筋去搞視頻,有咩好處? 依家以短視頻作為主要業務嘅內地企業,有抖音、快手(01024)、騰訊(00700)、百度(09888)、嗶哩嗶哩(09626),仲有阿里巴巴(09988)同網易(09999)等。早排就提過,「星爺」會同抖音合作,搞個「九五二七劇場」,而快手就會同陳坤導演聯手推出快手首部AIGC微短劇,仲預告,本月底推出首部AIGC微短劇《山海奇鏡之劈波斬浪》。 京東搞短視頻點樣賺錢?唔通又係上述玩法,定係好似網上音樂或歌曲咁逐隻賣?觀眾睇完預告,覺得「可以一看」就俾幾蚊去買?我就覺得唔會喇。首先,依家已經進入AI世代,資訊爆炸,唔驚冇嘢睇,最怕冇時間!再者,一間市值三千幾億港銀嘅電商去搞視頻,一定會諗,點樣利用視頻同現有經營項目製造協同效應。 據報內地做直插帶貨嘅所謂「網紅」有成1500萬,但95%月入唔到5000銀人仔,點解唔利用低廉勞工去做?首先,收入等於收視,觀眾少無效益,其次,部分網紅誇大產品效用,盞搞。不過,自己做埋反而可以把關,免得又俾市監局扣查。 京東舊年零售收入2676﹒46億人仔,係集團主要盈利來源,物流收入少咗,有472﹒01億人仔,所以斷估京東係想利用短視頻去幫自己賣嘅商品做廣告!可以植入式或者中間插入,收埋廣告費。不過,依家觀眾要求好高,視頻嘅內容既要有深度,又要易明同埋有故事性先得,咁先可以令觀眾對產品有深刻印象,分分鐘成為經典都唔奇!不過依家都係傳緊,係咪真有其事就要等京東公布喇! 今朝京東股價輕微調整,最低見103﹒1銀,但仍然高過短期密集區底部99﹒5銀,就算暫時維持喺密集區整固,以頂部111銀計都有短炒水位,較大阻力位係113﹒5銀,若然突破該位,上升空間巨大,首目標164﹒5銀,以今日最高位104﹒8銀入市計,都有超過五成七升幅,絕對值博,既然望得咁遠,穿81﹒55銀先止蝕啦!(pc) *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票