31/01/2024 16:51
《小傳日記》港股未著陸,大師先登六。沈四萬退休,魚缸有無救?
《小傳日記》人稱「沈大師」嘅著名股評人沈振盈近排就宣布退休,一講完「恒指見四萬」恒指就見咗萬四水平,令人懷疑沈大師係咪終於抵受唔住壓力。不過佢回應該行家訪問嗰時就表示,自己都年屆花甲,做券商壓力大,要減輕吓負擔,所以今日起就辭去訊匯CEO個位。不過佢就強調「手停口唔停」,「財經KOL」一定繼續做,股照講台照上,所以大家之後反而仲有機會多咗見到大師! 大師「燈力」無邊,多年來嘅「加持」堪比魚缸嘅反向ETF,單係今個1月就已經見到大師嘅威力。月初以來,原本以為遊戲監管收返手之後氣氛會回暖返啲,點知外資大手掟貨,A股H股齊齊跌,逼到阿爺「手口並用」,一邊派「國家隊」接貨,一邊放口風想搞「限沽令」。不過期間大師就點評,話魚缸衰唔曬,一定可以「突破40000點」,結果就引起股壇一番討論,有批評大師過份樂觀嘅,又有跪求大師唔好再燈嘅。不過外資之後繼續狂沽A股,上證綜指仲試過2700都穿埋,魚缸呢邊先穿16000,一個禮拜時間再穿埋15000見過萬四字頭,名乎其實「未見四萬先見萬四」! 唔知係咪阿爺都知大師燈力唔係講笑,臨近月尾終於再出「救市組合拳」,先有突發預告降準0﹒5百分點,消息喺A股收市後但港股未收市時公布,恒指幾分鐘內急飆200點。再之後幾日就接連有廣州、蘇州取消限購令,逐步加推措施,令到魚缸難得地見到「三連升」。 不過魚缸一過16000就明顯唔夠力要調頭向下,消息上美國一步入大選年就動作多,呢頭話聯想(00992)電腦會竊取國家機密,嗰頭又話唔畀幫襯藥明(02269),最新連電動車都話會危害美國安全,實行全方位多行業咁打壓中國,令到魚缸今個月都係16000不保。 未來一個月開始,魚缸就會少咗沈大師嘅操盤,唔知魚缸有無機會藉此逃過一劫呢?不過大師燈力並唔止落手,可能單用把口都已經發揮到作用,希望唔落手就可以燈力減弱啦,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情