26/01/2024 16:37
《小傳日記》美國選期到,藥明被開刀!股價跌得多,兩黨笑呵呵!
《小傳日記》阿爺果然喺前門救緊火,就有人喺後欄放火!近期阿爺終於下定決心放水,又降準又畀房企用貸款還債,一片欣欣向榮,但撞啱美國今日就連發兩炮打壓,包括AI同生科。 今朝有消息話,美國有「評論」引用到一個名為中國科技威脅(CTT)嘅組織嘅調查,話美國政府辦公室入面有大量made in China嘅Lenovo(00992)電腦,有機會向中共發送數據,所以應該立法禁用,結果今朝聯想最多要跌成13%。 再到下晝,藥明系忽然全系暴瀉,藥明康德(02359)最多曾暴瀉三成!後尾先再有消息公布,美國國會開會期間,一個由眾議院同參議院議員組成嘅兩黨小組提出咗一個法案,建議禁止某啲中國生物技術公司同聯邦政府簽約,因為堆公司係同中共有關,將會對美國國家安全構成風險。 事實上,今次都唔係美國第一次針對AI同生科開刀。中興(00763)、商湯(00020)都曾經被美國政府制裁過,藥明(02269)都已經係被制裁常客,之前美國商務部就試過將藥明生物兩間公司列入「未經核實名單」,當日都造成股價盤中暴瀉,但過咗一排又解禁返。又去到2022年中期選前,拜登都簽過行政命令要降低對中國生科嘅依賴,當日藥明又係要跌兩成。 睇返過往咁多次,幾乎每逢美國有選舉,都必然會搵中國生科公司開刀制裁,而且藥明經常都會畀面跌一兩成,所以呢幾年來美國政壇打壓生科嘅次數都愈來愈多,而且次次都立桿見影,所以到今日都係樂此不疲。 每逢選舉,「制裁中國牌」幾乎都係爭選票必備工具。近期兩黨舉行緊初選,當然又到咗祭旗藥明嘅好時機,但今次議案據聞由兩黨一齊提出,結果會幫著邊個呢? 美國大選今年11月先舉行,如果「打壓中國牌」繼續流行,今年中港股都可能會幾波動,間唔中又會打壓吓唔同板塊,晶片股、AI股、手機通訊股都可能成為打壓對象。呢幾年車企出海,之前都已經開始有跡象想禁,就睇吓兩黨仲有咩招可以出到,反正過去幾次打壓消息都係講完就算,好難對相關公司嘅業務有咩實質影響,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇