27/02/2024 16:15
《開市Good Morning》熊麗萍明講財政預算案、百度
《開市Good Morning》香江魚缸似足玩過山車,日內雖曾挫181點,點知下晝磨磨下竟然有得倒升!近尾市更衝高過近200點,收市仲保得住156點升幅,收報16790點,險守百天線。以現時條件而言,企穩百天線有無難度?但下個月就係傳統業績期,近期阿爺又積極托市,各方人士都要睇下各大央企會否增加派息率、或有否訂定提振市值嘅手段,變相孖屐短線窄幅上落係意料中事?上證綜指近期都喺3000點關爭持,一日未突破此水平、一日都難確認股市氣氛好轉? 聽日仲要睇實財爺公布財政預算案,孖屐三大呼聲包括樓市「撤辣」、續推盛事經濟及延續建屋造地方針。不過孖屐信心又係咪單靠「撤辣」就修復到?更何況現階段仍係只聞樓梯響,不宜過份憧憬?最驚就係一有咩利好消息傳出,孖屐就急急腳沽貨走人!政府力推盛事經濟,怕唔怕使咗大錢、但成效未如理想?神州消費降級情況持續,港府即使大大力推、遊客睇怕只肯急急腳走?對本地消費嘅利好作用可能言過於實! 至於聽日收市後公布舊年第四季業績嘅百度(09888),最受孖屐關注嘅當然係文心一言嘅發展啦!講科研講發展都一段時間,究竟真係搵緊錢未呢?宏觀經濟疲弱連帶廣告需求都未完全恢復,要靠廣告收入補貼龐大嘅AI研發開支,似乎遇上難關?政治風險影響下,百度股價今年都無起色,發展AI此雙刃劍已難再成為推升股價嘅單一催化劑? 聽日(28日)《開市Good Morning》搵嚟資深財經分析師熊麗萍,同大家分析上述股份、大市走勢,同埋當日嘅焦點股!歡迎大家提問投資及其他股票問題。記得準時8:55am,昅實《經濟通》NewsTV直播節目--《開市Good Morning》喇!或者click入嚟 https:╱╱www﹒youtube﹒com╱watch?v=96o6tjN087I 打個卡先又得!
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票