《小傳日記》香江魚缸到９月２３號就會正式實施「打風不停市」，到時「波照掛、股照炒」，「Ｘ氏力場」嘅都市傳說不再適用於證券界打工仔！所以今次摩羯為魚缸帶來嘅打風停市，好有可能係港股歷史上最後一次因為八號波而停市。忽發奇想，如果「打風不停市」早多一個月實施，今日照樣開市，魚缸又會點樣呢？　　首先係單日成交，雖然上個星期見到大成交，但今個星期魚缸又再落到唔夠千億水平，過去四日除開平均每日成交額係大約９３５億銀，加上花旗國就快公布非農數據，孖屐氣氛預料較為觀望，所以今日如果開市就可能大約成交９００億銀左右。政府上年１１月起將股票印花稅由０﹒１３％降返落０﹒１％，買賣雙方夾埋總共收０﹒２％，以９００億成交計，如果今日「打風不停市」的話，政府就可以收多大約１﹒８億銀印花稅收入。　　至於恒指走勢，以全年無休、２４小時運作嘅「黑期」嚟睇，截至下午４點大約係跌１００點左右，都同今日有可能出現嘅觀望市況相似，因為噚晚公布「小非農」８月ＡＤＰ職位空缺新增只有９﹒９萬個，大幅低於預期，拖跌隔晚道指，但官方非農未正式公布，恒指先跟跌１００點都差唔多。如今魚缸避咗呢百點跌幅，如果官方非農都一樣差過預期，外圍再跌，魚缸下星期返嚟可能要賠多份都未頂，話唔定真係「是禍擋不過」。　　至於今日主角都一定係國泰君安（０２６１１）鯨吞海通（０６８３７），係神州有史以來最大嘅券商合併，更加係規模最大嘅ＡＨ雙邊市場合併案例。消息帶動Ａ場券商股集體升停，魚缸呢邊券商板塊下星期一可能會追升。　　而講到更貼近魚缸呢邊行情嘅，就當然係新地（０００１６）年度放榜，全年少賺兩成，年度基礎溢利亦跌９％，連末期息都大減２４％得返２﹒４銀！雖然普遍大行績後都無大劈目標甚至有升，但派少咗息難免得失缸友，下星期返嚟都可能難逃一跌。　　同樣放榜嘅仲有蔚來（０９８６６），次季收入差唔多翻咗番，成１７４﹒４６１億人仔，經調整虧損收窄超過１６％，毛利率９﹒７％亦高於預期１個百分點；消息刺激噚晚ＡＤＲ大升一成四，可惜今日魚缸停市，令蔚來ｍｉｓｓ咗大升嘅機會，ＡＤＲ折合收市價係３７﹒８銀，計返港股就相當於大破１００天線（約３５﹒３７元）兼重上７月阻力位，唔知下個星期返嚟仲有無力呢？　　有評論就話今日停市會令孖屐損失最後押注花旗國非農嘅機會，變相令星期一（９號）返嚟嘅魚缸風大浪大，咁又啱嘅，近期恒指牛證都開始建倉喺１７０００甚至係以下水平，如果今晚非農真係唔得，魚缸下星期穿萬七機會都係認真唔小，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好