《小傳日記》今日係９月２５日，按照原計劃，歐盟２７個成員國將於今日投票表決關稅案，但據報將會延遲，畀雙方有更多談判時間。早前，商務部部長王文濤喺歐盟總部會見歐盟貿易官員東布羅夫斯基斯，雖然雙方會後無達成協議，但就透露：中歐將繼續進行價格承諾協議談判，以換取無關稅。「價格承諾」意味著包括比亞迪在內嘅中國車企出口歐盟時，主動抬高售價，減少對歐盟車企帶來衝擊。　　歐盟方面是否如媒體報道，願意將收起關稅武器，換取神州車企以更高價格賣到歐洲？暫時未知。如果係真，對車企可以話係放下心頭大石。唔單止慳返關稅，仲可以多賺歐洲消費者一筆，何樂而不為？雖然抬高價格可能令銷量下跌，但中歐生產成本相差甚遠，加價都好合理啫。不過你有你談判，我有我部署，一眾電動車企已經密鑼緊鼓將旗插滿歐洲。　　蔚來汽車（０９８６６）早喺今年６月，亦即係歐盟啟動對華電動車開徵額外關稅嘅時候，旗下車型ＥＬ８已經喺挪威、德國、荷蘭、瑞典和丹麥五國上市，據報近日仲開始交付添；至於零跑（０９８６３）Ｃ１０和Ｔ０３噚日亦正式喺歐洲１３國正式上市，預料２０２４年第四季度，零跑國際歐洲銷售渠道將超過２００家。　　按照歐盟早前計劃，將向中國產電動汽車徵收高達３６﹒３％關稅。惟對中國產特斯拉電動車收取稅率，由７月初公布嘅２０﹒８％，調低至９％，而比亞迪（０１２１１）汽車徵收嘅關稅，就下調０﹒４個百分點至１７％。至於所有不合作公司嘅中國產電動車，包括上汽汽車，關稅稅率就由３７﹒６％，調低至３６﹒３％。不過，小鵬汽車（０９８６８）、蔚來、零跑汽車、長城汽車（０２３３３）等被評為配合調查車廠，稅率暫定為２１﹒３％。　　　既然稅率咁高，潛在風險咁大，點解各大車企仲爭先恐後，趕住去插旗？無他嘅，皆因歐洲對電動車企來講，就好似昔日嘅金山一樣，大把油水。有媒體將中國，歐盟和美國三地電動車銷售價格作比較，以２０２３年上半年價格為例，中國電動車均價為３１１６５歐元，歐洲均價為６６８６４歐元，美國為６８０２３歐元，即係歐美汽車均價比中國高出一倍有多，就算加足３６﹒３％關稅，中國電動車均價都只係４２４７８歐元，歐洲產電動車都仲係比中國產貴一半以上，難怪一眾車企懶得理歐盟徵稅最終定案，皆因自家產品有「底氣」。請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【etnet 30周年】多重慶祝活動一浪接一浪，好禮連環賞！ ► 即睇詳情