《魚缸博客》陸家嘴論壇今日開始，一如所料中證監重磅推出「科創板八條」，要突出科創板「硬科技」特色，鼓勵科創板健全發行承銷、併購重組、股權激勵、交易等制度機制，更好服務科技創新和新質生產力發展。　　ＡＩ股沉寂一時今日終於借到東風彈升，其中美圖（０１３５７）半日最多升超過一成，而創辦人兼主席兼ＣＥＯ吳欣鴻噚日就「咁啱」使２４８萬銀增持咗１００萬股，然後今日就食正ＡＩ股炒風，真係好手氣。　　不過美圖今個禮拜都只係算反彈，上個禮拜就按周急跌咗一成三。事緣上星期美圖舉行第三屆「美圖影像節」，曬冷旗下新產品，推出六款新ＡＩ工具，其中ＭＯＫＩ作為影片ＡＩ生成工具，但就唔做如今最興嘅長片生成，而專注做短片創作。　　孖屐就覺得美圖唔走去追上人哋技術，反為做一瓣唔係市場熱炒嘅概念，搞到美圖股價急跌，先做到個低位畀主席入市增持。雖然主席喺會上提到唔想同Ｏｐｅｎ　ＡＩ嘅Ｓｏｒａ正面對決，所以先去做短片ＡＩ生成，被孖屐視為笠水，但實際上呢瓣都唔係無得做。　　騰訊（００７００）近年遊戲業務飽和，所以增長引擎已經逐漸改為微信視頻號，而視頻號亦都爭氣展現佢喺廣告上嘅強大賺錢能力。視頻號主打流量變現，而流量多寡就由內容而定，所以生成一條可以喺幾秒內就吸引人唔碌走嘅片非常重要。但剪片技術唔係人人有，美圖如果可以幫到內容生產者慳水慳力做到一條高流量短片，絕對可以借到短視頻嘅流量變現能力。　　美圖今日借「科創板八條」同主席增持消息反彈，現價喺２﹒７銀支持變阻力水平爭持，現價不妨考慮追入，始終股價都已經跌咗一輪，唔跌穿２﹒４銀都仲值得揸住先，短線上望牛熊線位大約３蚊水平。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇