《魚缸博客》呢兩日股市氣氛轉好，恒指繼昨日大漲６００幾點後，今日開始繼續炒高。一眾成分股排行榜開市時升多跌少。早排跌到頭耷耷嘅舜宇光學（０２３８２），呢兩日都升得係威係勢。舜宇光學尋日公布，２０２４年１月手機鏡頭出貨量約１﹒０３億件，按年增長５４﹒８％。當中，車載鏡頭出貨量１２０４﹒８萬件，按年升３１﹒２％、按月升１５５﹒７％。而手機攝像模組出貨量按年增５２﹒９％至６２２５﹒６萬件。幾組數據睇到人眼花繚亂，不過，信息只有一個，就係「今年好過舊年」。經歷咗兩年低潮，舜宇光學最壞時刻或已過去。　　此外，舜宇光學上周三（３１日）公布，截至２０２３年１２月３１日止年度，預期將錄得股東應佔溢利約１０﹒８４億至１２﹒０４億人民幣，按年減少約５０％至５５％。對比中期業績，截至６月３０日止，應佔溢利為４﹒３６億人民幣，按年減少６７﹒８％，顯示集團下半年嘅業務有所改善。　　睇返股價走勢圖，舜宇光學股價跌足兩年。到前日（５日）低見４３﹒５元，創下七年最低價。正所謂「物極必反」！跌咗咁耐，點都要企返起身。昨日趁住恒指大幅抽升，舜宇股價亦借勢反彈，升近７％。今日藉住集團１月出貨量增長嘅好消息，股價再次炒上，高見５２﹒４元。不過，連續兩日炒高，累積升幅唔小，等股價稍微回調到５０元樓下，可以考慮小注入市，目標價６２元，４６元止蝕。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情