《小傳日記》兩會今日（４日）展開，孖屐都期待緊會有好消息落地，未有消息前，魚缸好友淡友都唔敢輕舉妄動。雖然今日恒指只係升６點，不過成交就過千億銀，睇來今次真係好淡交戰！　　雖然恒指變幅平淡，不過藍籌就表現精彩，可以話風水輪流轉；之前跌殘嘅藥明孖寶雙雙升一成有多，係最佳表現藍籌，但係之前「升光燦爛」嘅理想（０２０１５）就要跌足一成！事實上理想消息面上並唔差，上個禮拜五（１日）就發布咗新車ＭＥＧＡ，係旗下第一架純電ＭＰＶ，只要充電１２分鐘就續航５００公里，擁有１００款標準配備的旗艦配置，定價５５﹒９８萬銀人仔，下個禮拜開始交車。除此之外，理想同時ｕｐｇｒａｄｅ舊車型，發布埋２０２４年新款Ｌ７、Ｌ８及Ｌ９，三架新車售價介乎３１﹒９８萬至４５﹒９８萬人仔。　　一次過推咁多款車，不過孖屐似乎就唔係好受落，今日就起勢狂沽，最多要慘跌一成四。近期間間車廠都鬥平，由Ｔｅｓｌａ同ＢＹＤ（０１２１１）帶頭嘅減價戰，新勢力都無得唔減。不過理想就反其道而行，面對減價戰都唔願意自貶身價，賣貴車之餘就連新款車都唔想減價，最平都要３２萬人仔起跳，算係中高價水平。　　之前減價戰開始，孖屐都將開始減價嘅車股ｄｏｗｎｇｒａｄｅ，因為減價會影響盈利。不過理想唔減價兼企硬高價，孖屐今日就驚佢吊高嚟賣會無人吼，乘勢沽爆佢，所以根本減價又沽，唔減價又沽。事實上理想上個禮拜因為成績表大超預期炒起，最高見過差唔多１８３銀，９日ＲＳＩ去到成９２嘅嚴重超買水平兼大幅偏離１０天線，有返些少食胡盤都唔出奇，兼夾過去幾日都有唔少沽空盤，到今日收一收網都正路。而今日主動買沽比率都仲係買盤佔多，有５４比４６，反映都仲有人接貨同平淡倉，所以後市都仲可以觀望住先。　　其實理想都已經係少數仲敢喺減價戰入面企硬嘅車廠，叫價企得硬就自然有原因，小鵬（０９８６８）同蔚來（０９８６６）公布２月份交車量都分別要跌兩成四同三成三，反而理想２月交車就多差唔多兩成二，就咁都已經高下立見，亦足以讓人明白點解理想可以咁進取定價。到下個月頭，就可以知理想高價政策係咪行得通，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】etnet全新頻道盛大推出！全港最齊盛事活動資訊盡在掌握！► 即睇