10/07/2024 11:58
《魚缸博客》無人駕駛概念翻炒!優必選再落返100銀博得過
《魚缸博客》沉寂兩個月嘅百度(09888)終於回春,半日升夠一成有多,孖屐睇好旗下玩咗年幾無人駕駛服務「蘿蔔快跑」將會喺家鄉武漢迎來第一年收支平衡,所以今朝就無懼之前單交通意外大升。而查實魚缸入面無人駕駛概念並唔只係得百度,優必選(09880)都係其中之一。 今日AH股都熱炒無人駕駛概念,其中一條消息就係北京經信局呢半個月以來都就《北京市自動駕駛汽車條例(徵求意見稿)》對外徵求意見,希望喺堅守安全底線的基礎上,為L3級或以上自動駕駛汽車市場主體提供清晰、透明、可預期嘅製度規範。其中明確支持自動駕駛汽車用喺城市公共電汽車客運、出租汽車客運(叫車)、汽車租賃等城市旅遊服務。 今個月初,優必選就宣布同一汽大眾達成合作,共同探索人形機械喺人工業場景嘅深度應用,打造高智能化生產線同汽車超級無人工廠。除此之外,優必選一直專注無人駕駛物流車,上年就發布L4級無人物流車「赤兔」,具備度智慧化的定位導航感知技術,實現室內外場景物流無人化的無縫銜接。物流智能機器人業務喺上年就為優必選帶來3﹒9億元人民幣收入,按年增加48%。 優必選最勁一次就係今年3月試過兩日內由100銀暴升上328銀,先至令呢隻股獲得孖屐關注。如今再落返去100銀至110銀左右,睇好無人駕駛概念不妨小注押落去,博之後有咩消息爆升都有得執些少。 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票