《魚缸博客》月初新世界（０００１７）發布震撼盈警，預計全年勁蝕１９０億至２００億銀，就算只係計持續經營業務，都錄得按年１８％至２３％嘅核心經營溢利倒退。雖然新世界一早已經被睇淡，但話曬係四大藍籌地產之一，咁嘅境況難免引發一片愁雲慘霧，好在銀行快手減Ｐ，先暫時為地產市道撥開雲霧，但醜婦終需見家翁，新世界又準備正式放榜。　　近期新世界其實暗潮洶湧，明顯見到集團過去呢一年以來不斷撲水填氹。新世界最先就係向家族求救，上年６月底鄭氏家族嘅周大福企業對新創建（００６５９）提全購，隨後主動推翻強制私有化建議，維持新創建上市地位，１１月完成交易後為新世界套現２１７﹒５億銀。隨後系內經常都見到有交易或者發債等等籌錢行動，包括新創建先發５０億銀人幣熊貓債，再發４億美元債等等，最新又公布悉售購Ｆｒｅｅ　Ｄｕｔｙ全部股權俾瑞士免稅店零售商Ａｖｏｌｔａ。　　籌旗套現之外，新世界人事變動更加值得關注。近年新世界積弱，市場普遍都歸咎於執行副主席兼行政總裁鄭志剛管理不善，打骰期間令負債上升，仲要爆出柏傲莊要重建，令集團資金壓力百上加斤。近期新世界二代掌舵人鄭家純出山，主導周企成立行政總裁辦公室，由孻仔鄭志亮擔任聯席行政總裁兼北亞洲主管，市傳鄭家純此舉有意「重新立儲」、問責鄭志剛。而新創建最新賣出Ｆｒｅｅ　Ｄｕｔｙ，反映回籠資金兼「拗正盤數」就係系內嘅最高任務。　　新世界明顯「等錢使」，令孖屐對公司前景有更多傳聞，最新有傳國資嘅華潤系會進場新世界，假如消息成真都係相當震撼。事實上傳聞都唔係無根無據，上個月底就有傳華潤隆地會以９０億銀收購河內道Ｋ１１　Ａｒｔ　Ｍａｌｌ，至今仲未有正式公布。而華潤隆地近期多番傳聞有意洽購唔同本地物業，包括已經成交嘅５﹒４億銀買入將軍澳藍塘傲商場連停車場，另外海洋公園萬豪酒店、旺角ＭＰＭ商場都疑似係華潤隆地目標之一。有意見認為國企背景嘅華潤隆地入手香港物業，算係內地有意幫一幫本地樓市嘅行動之一，而針對負債高兼「等錢使」嘅新世界，入股幫手科水都不足為奇。但傳聞歸傳聞，目前仲有待公布，但星期四放榜會有大事發生嘅機會就一啲都唔低。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇