25/03/2024 11:58
《魚缸博客》美團去年純利創新高,股價可唔可以返去高峰期?
《魚缸博客》美團上周五(22日)收市後公布業績,截至2023年12月31日止全年純利138﹒56億元人民幣,而對上一年同期淨虧損66﹒86億元人民幣。當中,截至2023年12月31日止第四季純利22﹒17億元人民幣,而對上一年同期淨虧損10﹒84億元人民幣。以非國際財務報告準則計量,錄經調整溢利43﹒75億元人民幣,按年升4﹒28倍,好過市場預期。 張成績表又的確見得吓人嘅,賺成百幾億人仔喔,印象之中,美團仲係第一次賺咁多錢。大家可能覺得奇怪,以一家市值超過5千億嘅上市集團來講,一年賺嗰一百幾十億其實濕濕碎,有乜咁出奇?人地市值少過美團幾百億嘅網易(09999)舊年都賺成294億人仔,多美團一倍幾啦。百度(09888)都賺203億人仔。奇就奇在,自從美團上市以來,市場對佢就無限遐想,好似當咗佢係第二隻股王騰訊(00700)咁,升值潛力無限,所以股價曾經被推到460元嘅「癲」峰。或者大家都覺得佢手上有咁多客源,係一大資產。但喺今時今日呢個大數據時代,有過億客仔嘅企業唔係少。所以,佢嘅優勢到底可以為集團創造幾多盈利空間仲係疑問。 今朝大市反覆靠穩,暫時升緊幾十點。但美團股價已經藉勢抽升,最高升近一成。向紅底股目標又邁進一大步,現價仲買唔買得過?又唔係唔得嘅。難得賺過百億,估計應該會繼續有炒作。不過,如果幻想股價升到當年的高峰,就有啲不切實際。股價自年初低位61元附近,累積升幅超過一半。入市要睇位,雖然變返紅底股的機會好大,但短期升到108元就已經差不多。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情