《魚缸博客》三中全會第三日，都仲未等到咩好消息，魚缸已等到花兒都開始謝，大市成交前兩日都唔夠千億，呢個市認真難玩。呢兩日都有唔少股回落返啲，今日博客就吼中隻百度（０９８８８）。　　百度同時具有ＡＩ同無人駕駛概念，上個禮拜因為孖屐憧憬蘿蔔快跑有望第一次成功轉賺，令孖屐重新留意呢盤冷飯，令ＡＨ場同時炒起返呢個概念。　　不過瑞銀就吹淡風，話對於百度近期核心增長持謹慎態度，預計第二季核心廣告收入按年要跌３％，而基於宏觀經濟復甦緩慢、前一年嘅高基數效應，以及持續推出「未賺到錢」嘅ＡＩ驅動搜索內容，於是就將目標價由１６１元降至１４６元，維持「買入」評級。　　不過佢有佢講，孖屐有孖屐做，呢兩日百度都調整返落嚟，今日大約落到１０天線大約９１銀水平都有啲支持，９０蚊邊應該係有一定力。短炒嘅其實不妨喺９０蚊附近部署，試多次挑戰紅底都有一成可以執吓，穿２０天線咪走咗佢囉。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇