《魚缸博客》放完暑假，學生哥要收心讀書，而投資界就當然要關心一下神州暑假期間嘅零售表現，７月內地消費品零售總額同比增長２﹒７％略勝預期，但去到８月就跌晒ｗａｔｔ，同比增長率得番２﹒１％，差過預期嘅２﹒５％，甚至係今年以來嘅第二低水平，真係慘慘。按商品分類去睇呢份數據，拖累內需消費嘅罪魁禍首當然係比重最高嘅汽車啦，受累市場飽和、車廠降價去庫存，８月零售額同比大跌７﹒３％，一下子拖低晒整體表現。　　但就算撇開汽車業，內需前景一樣受挑戰，涉及底層需求嘅糧油食品類，上月零售表現增長一成，但比較高端嘅化妝品同金銀珠寶類，就分別同比下跌６﹒１％同１２％，消費降級之說並非三人成虎嘅戲言。　　至於暑假旅遊出行表現又如何呢？咁啱神州三大民航公司都出咗８月嘅成績表，其中東航（００６７０）載客量增加１８％，國航（００７５３）增加１５％，南航（０１０５５）增加１３﹒５％，睇落好似都幾好吖，但係股民千萬要注意，所謂嘅客流量增長只不過係假象！　　根據航旅縱橫嘅數據，上月機票票價要比去年同期低咗超過一成，事關內地航企飛境內線，面對來自高鐵嘅競爭，真係無咩叫價能力，機票降價最多只可以做到旺丁不旺財，而且好多人因為所在城市無機場，又或者航線嘅時間班次配合唔到，又或者純粹係唔敢搭飛機，就算機票降價降得再多，佢哋都未必會考慮衝上雲霄。　　屋漏偏逢連夜雨，內地進入中秋佳節，上海卻面臨建國以來最大颱風，當地兩大機場航班全停，中秋旺季未打先輸一仗，飛機股認真慘情，股民登機前請三思！　　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇