03/04/2024 11:46
《魚缸博客》SU7獨有「人車家全生態」,小米趁低要追買!
《魚缸博客》雷軍多年嘅心血結晶SU7終於喺上個禮拜落地,事前保密售價,結果一開價就見到標準版只係賣21﹒59萬人仔,令孖屐都好驚喜,24小時內已經大賣8﹒89萬架,成績相當彪炳。 不過靚價都要本身架車靚先賣得出,唔少車評都提到,SU7每百公里加速最快可以去到2﹒78秒,標準版續航力有成700公里,Max版更加去到800公里,對辦之餘更加有額外驚喜。而外型上,先前車業一窩蜂咁做SUV,但SU7係轎跑車型,車身無SUV咁大,外觀上無咁笨重,喺芸芸SUV入面反而比較突出,亦都可以吸引到已經睇厭SUV嘅準買家。 而最重要就係,SU7生產商係小米,賣車背後仲有手機同智能家居,目的就係創造「人車家全生態」。之前講起小米「人車家」,話可以喺車入面控制到全屋家電,講落容易,當目到實測之後就更加有實感。有上面博主試坐SU7,手機可以直接連接車入面控制屏之外,更加已經連接咗屋企嘅智能家電,如果開咗語音控制模式,只要同小愛同學講聲叫佢開燈,屋企燈就會自動開咗。更加犀利嘅係,可以將「開燈、開冷氣、開電視、閂窗簾」整合成為一個「回家模式」,喺車入面一聲令下「小愛同學,開啟回家模式」,上面四個動作就可以遙距完成!呢啲都係只有小米做到,其他車企都只係限於研發車嘅科技,最多都係得蔚來多咗部電話,而小米一機在手,就已經掌控日常生活所有空間。 雖然呢兩日小米股價炒高後回吐,但憑SU7嘅銷量以至成個AI智能生態嘅實用程度,小米不妨揸耐少少去捕捉「人車家全生態」嘅增值潛力,目前15﹒4銀至15﹒5銀係值得趁低追入水平,入手後初步上望17﹒5銀,升得過17﹒5銀可以加注博見19﹒5銀,穿100天線止蝕。(hc) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票