《小傳日記》新年後開市差唔多一個禮拜，上個禮拜都可能因為得返三日，好多同事都放咗大假，今個禮拜先正式返齊，對於可以收利是嘅同事先算係「功德圓滿」！　　講起利是，公司普遍都會派開工利是畀員工，雖然銀碼唔同，但有好過無啦。一般都好難知道唔同公司派開工利是嘅公價，但逢過年都會有傳媒整合各大銀行嘅開工利是銀碼，等大家拼吓自己嗰封係唔係合理事平！　　今年滙控（００００５）旗下滙豐、中銀（０２３８８）同恒生（０００１１）都一樣係派５００銀大牛一張，應該都可以算係公價，而東亞（０００２３）同星展就細封啲，不過最低限度都「見紅」，派人人１００銀一封。另外都仲有出手非常闊綽嘅，外資嘅花旗就派人人８００銀，中資背景眾安就大派人人一封金牛兼有１００００銀大抽獎！　　另外，最有趣嘅都係渣打（０２８８８），同派開工利是嚟大抽獎，銀碼由２００銀到股票冧巴嘅２８８８銀不等，收幾多就各安天命喇。另外，渣打仲加碼來多個員工大抽獎，獎品包括２５０００「亞洲萬里通」里數、迪迪尼門票同酒店禮券等等，聽到人都想入去做！　　過去一年係經濟復甦嘅一年，但係速度比預期慢，可以作為好景指標嘅尖沙咀海港城上年嘅聖誕布置都比較簡單，好有可能上年並唔係各行各業嘅恢復進度都一樣。但睇返上面銀行派嘅開工利是，渣打、花旗同眾安都比起上年加咗碼，會唔會係比較睇好未來一年嘅成績呢？雖然都唔可以成為指標，但派多一定好過派少，起碼士氣都好得多，你嗰封又夠唔夠鼓勵你呢？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】美國總統大選在即，你認為誰將最終當選？► 立即投票