《小傳日記》魚缸業績期尾聲，輪到中資系列嘅中特估股份登場，缸友到呢刻都未敢掉以輕心，要睇曬成個業績期先再部署下一步，搞到呢幾日都唔夠１０００億銀，日日都係乾升收場。呢幾日咁低成交，就連一隻拼多多喺美股成交都可以多過港股，港股真係無面。　　不過拼多多大成交都唔見得係好事，捱沽兩成八換嚟嘅大成交，相信缸友都唔會恨。上年用輝煌嘅業績砌低巴巴（０９９８８）成為最高市值美股中概嘅拼多多，噚晚就出咗一份少少跌ｗａｔｔ嘅成績表，次季收入多８６％去到９７０﹒６億人仔，低過市場預期，但經調整純利多１﹒２５倍去到３４４﹒３２億人仔，就好過預期，所以其實升係不過不失，只係珠玉在前有啲失色咁。　　但衰就衰在拼多多自行大力唱淡。拼多多董事長兼聯席ＣＥＯ陳磊喺電話業績會上重磅出擊，警告孖屐話競爭加劇同外步挑戰，準備犧牲短期利潤，仲講明因公係投入期，未來幾年都唔會派息亦唔會回購！好股立即變成「三無股」，無派息、無回購兼無前景，嚇到美股嗰邊恐慌式清倉拼多多，埋單暴瀉兩成八，勉強守著百元大關。　　唱淡前景已經令人擔憂，管理層仲要講明「唔派息唔回購」，而且唔止一年而係幾年，直頭係最淡嘅講法，所以事後都引起孖屐討論：拼多多何須唱得咁淡？有一個最有趣嘅講法就係，拼多多創辦人黃崢今個月初爬頭鍾睒睒成為神州首富，傳聞話黃崢怕「槍打出頭鳥」，所以自己搞跌拼多多，於是就可以由首富變返排第四，不過呢種說法都係講笑居多。　　而有啲ｓｅｎｓｅ嘅講法就係期望管理，呢個就比較有說服力。美股好興成績表之後跟一份收入指引，即係預下未來嘅生意變化，就好似而家都無咁重視美聯儲局嘅議息結果，反而鮑威爾之後講兩句先係孖屐嘅炒作重點，所以今次拼多多都一樣，董事長多嘴講兩句，就冚過曬份業績。　　拼多多上年底因為超級業績炒起，呢一年內都維持大約１１０美金至１６０美金上落，對比歷史水平都算係偏高位置。未來一段時間雖然係減息周期開始，但神州市道可唔可以應聲即彈都係未知之數，計埋競爭因素，道理上可以話變差嘅機會大過再變好，即係只輸不贏，現家先行講到最淡，令到要沽嘅都一次過沽曬先，或者真係可以減低之後嘅沽壓，當係長痛不如短痛。　　雖然明言未來幾年唔派息唔回購，淡到令人覺得誇張，但如果一兩年後反口話派息，咁又咪可以炒一轉喜出望外囉，難怪都有大行建議即刻撈底，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇