18/01/2024 17:03
《小傳日記》「福萊蒽特」唔係「福萊特」?名似兼係同行都仲得!
《小傳日記》A場上演「大奇跡日」,原本上證綜指今朝仲要跌多2%,結果尾市「顯靈」,傳聞話國家隊再度喺尾市進場瘋狂掃貨,好幾個板塊單日轉向拉升,結果倒升之餘同時收復2800,如果魚缸都有「政府隊」你話幾好呢? 就算未有「政府隊」,魚缸今日都迎來新年第二升,全日爭氣升114點。爭氣嘅今日有唔少股都拗升,好似隻福萊特玻璃(06865)今日就飆超過6%,升穿百天線,走勢都相當之靚。光伏都曾經係熱炒概念,「碳達峰碳中和」之外唔少公司都想撈一浸。不過市道轉差之後,就發現轉型需時,短期內要谷經濟,慳水慳力平靚正都係要用返化石能源,所以呢兩年啲光伏概念股都吊曬車尾,反而煤炭股就連續兩年跑贏大市。 福萊特今日爭氣升,福萊特A(滬:601865)都跟升,睇睇吓仲發現咗隻福萊蒽特(滬:605566)。係福萊「蒽」特唔係福萊「蔥」特,係「艹」頭下面做個「恩」,本身睇到仲以為係福萊特旗下一間公司,但原來係毫無關連。蒽本身係一種芳香揮發性化合物,經煤焦油提煉出來,可以用來合成多隻化合物。而福萊蒽特本身係一間紡織染料生產商,主要生產耐洗、耐曬嘅染料。 原本以為有報道搞亂咗福萊特同福萊蒽特,將福萊蒽特呢間染料商都當成係光伏概念,點知福萊蒽特都真係有光伏概念。2022年開始,福萊蒽特就新成立子公司杭州福萊蒽特新能源有限公司。當然唔係無啦啦轉做太陽能板,據公司2023年財報就話,福萊蒽特新能源嘅主要業務為太陽能電池封裝膠膜業務,主要生產POE或者EVA等等塑料造成嘅膠膜,用來封裝太陽能電池,摱車邊都係光伏行業嘅一份子。睇返財報,2022年全年,福萊蒽特光電封裝材料業務收入為大約1﹒51億人仔,佔公司總收入接近一成半,但係分部毛利率只係得1﹒3%,反映都仲係非常初步階段。 兩地股市都有唔少撞名股,好似美團(03690)同美圖(01357)就睇落好似,而內房就有陽光100(02608)同A股陽光城(除牌前深:000671)。福萊蒽特做開染料忽然撈過界做電池嘅封裝膠膜,仲要賺得唔多,但係逢講起光伏概念嗰陣,福萊蒽特同福萊特都可以齊齊叫做光伏概念。股唔大,但黐得埋熱炒概念點都有著數,搵開福萊特都會睇到福萊蒽特,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票