04/03/2024 16:53
《小傳日記》減價又沽,唔減價又沽!理想捱沽只因炒家要食胡?
《小傳日記》兩會今日(4日)展開,孖屐都期待緊會有好消息落地,未有消息前,魚缸好友淡友都唔敢輕舉妄動。雖然今日恒指只係升6點,不過成交就過千億銀,睇來今次真係好淡交戰! 雖然恒指變幅平淡,不過藍籌就表現精彩,可以話風水輪流轉;之前跌殘嘅藥明孖寶雙雙升一成有多,係最佳表現藍籌,但係之前「升光燦爛」嘅理想(02015)就要跌足一成!事實上理想消息面上並唔差,上個禮拜五(1日)就發布咗新車MEGA,係旗下第一架純電MPV,只要充電12分鐘就續航500公里,擁有100款標準配備的旗艦配置,定價55﹒98萬銀人仔,下個禮拜開始交車。除此之外,理想同時upgrade舊車型,發布埋2024年新款L7、L8及L9,三架新車售價介乎31﹒98萬至45﹒98萬人仔。 一次過推咁多款車,不過孖屐似乎就唔係好受落,今日就起勢狂沽,最多要慘跌一成四。近期間間車廠都鬥平,由Tesla同BYD(01211)帶頭嘅減價戰,新勢力都無得唔減。不過理想就反其道而行,面對減價戰都唔願意自貶身價,賣貴車之餘就連新款車都唔想減價,最平都要32萬人仔起跳,算係中高價水平。 之前減價戰開始,孖屐都將開始減價嘅車股downgrade,因為減價會影響盈利。不過理想唔減價兼企硬高價,孖屐今日就驚佢吊高嚟賣會無人吼,乘勢沽爆佢,所以根本減價又沽,唔減價又沽。事實上理想上個禮拜因為成績表大超預期炒起,最高見過差唔多183銀,9日RSI去到成92嘅嚴重超買水平兼大幅偏離10天線,有返些少食胡盤都唔出奇,兼夾過去幾日都有唔少沽空盤,到今日收一收網都正路。而今日主動買沽比率都仲係買盤佔多,有54比46,反映都仲有人接貨同平淡倉,所以後市都仲可以觀望住先。 其實理想都已經係少數仲敢喺減價戰入面企硬嘅車廠,叫價企得硬就自然有原因,小鵬(09868)同蔚來(09866)公布2月份交車量都分別要跌兩成四同三成三,反而理想2月交車就多差唔多兩成二,就咁都已經高下立見,亦足以讓人明白點解理想可以咁進取定價。到下個月頭,就可以知理想高價政策係咪行得通,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情