12/08/2024 11:57
《魚缸博客》捱過疫情捱過消費降級,點解銀娛股價仲見7年低?
《魚缸博客》今日恒指窄幅上落,上落講緊都係幾十點。但澳門賭業股今日普遍下挫,尤其是幾個大的賭業股,跌幅介乎3%至5%。當中銀娛(00027)最誇張,暫時跌緊過5﹒5%,見7年低。點解賭業股表現咁差?話說澳門立法會上周五(9日)開會,討論打擊《非法賭博犯罪法》。 據澳門媒體報道,新增法律條文,包括建議將換錢黨喺娛樂場範圍兌錢行為刑事化,最高判刑5年;若果喺娛樂場外不涉及供博彩換錢業務行為,則以金融法律處以行政罰款;即使喺娛樂場範圍外,只要經搜證涉及博彩兌換,亦列為刑事。報道又指,法案建議酒店同商場範圍均屬娛樂場附屬相鄰設施,視為娛樂場範圍,喺有關範圍內換錢一樣被推定為博彩用途嘅兌換,可判1個月至5年,其中法案只有寫最高5年。 雖然博客一向唔賭,但都知道賭博行業同換錢業務息息相關。賭業捱過四年疫情,好唔容易迎來疫情完結,開關復常,旅客入境數字節節上升。以為賭業股可以大展拳脚時,點知又遇到內地經濟增長放緩,消費降級,加上股市低迷,賭業股前景再受挑戰。而今次法案,無疑為賭業股雪上加霜。 根據澳門官方數據,今年上半年入境澳門的旅客超過1600萬人次,按年上升43﹒6%,恢復至2019年同期的82﹒4%。數字雖然節節上升,但好睇唔好食。事關唔過夜旅客高達888萬人次,增加59﹒3%。而過夜旅客只有783萬人次,只增加29﹒1%,數字顯示,不過夜旅客成為趨勢,對酒店業無疑係一大打擊,尤其對高端酒店業影響更大。 銀娛股價雖然跌至7年低,但由於影響業務嘅幾個主要因素尚未明朗,內地消費疲弱情況短期內料難以扭轉,房價和股市亦未見曙光,預料對集團業務仍具挑戰。因此,股價再平都要忍忍手,事關唔知幾時先跌完。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票