16/08/2024 17:11
《小傳日記》銀娛豪派中期息定軍心!但賭業收入難再大增?
《小傳日記》QQ(00700)、巴巴(09988)同京東(09618)都經已放榜,好在整體都符合預期甚至有驚喜,孖屐都終於鬆吓手,撈返多少缸底貨,京東系就最受惠,單計京東就升接近9%,京東健康(06618)升8%有多,京東物流(02618)暴升22%,總算枯木逢春。 講起驚喜估唔到賭股都有份,捱咗沽整整一年時間,銀娛(00027)終於出返份似樣嘅成績表。今年上半年銀娛純利多差唔多52%去到43﹒87億銀,經調整EBITDA多37%去到60﹒1億銀,單計收入都多超過36%,有成214﹒71億銀。最重要就係有派息!今次中期終於唔係以特息名義派,堂堂正正叫「中期息」50仙,比上年中期嗰次「特息」20仙多成1﹒5倍! 主席呂志和就講明,銀娛持有現金及流動投資290億銀,扣埋負債38億銀,淨現金有成252億銀,所以派多倍半息都仲得,亦引證對馬交同銀娛長期發展嘅信心。事實上,今趟銀娛喺方方面面都賺多咗,雖然係低基數原因,不過賺多咗就係賺多咗。期內淨博彩收益多41%達167﹒8億銀,其中貴賓廳收入多56%達26﹒9億銀,中場收多43%達160﹒2億銀,角子機收入多61%達12﹒6億銀,整體博彩收入都係逐步回升。 啱啱上個禮拜馬交立法會先討論立法禁制換錢黨,可想而之係配合返神州加強打擊資金外流嘅風險。其實「賭」對於上面嚟講都非常雞肋,對馬交嚟講係經濟支柱,但偏偏助長資金外流,令到上面雖然唔會禁賭,但一定唔會容許「大賭」,喺咁樣嘅背景之下,好似禁換錢黨之類嘅政策都會間唔中出現,即係餅總會愈嚟愈細,賭股前景仍然係堪憂呀,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情