01/03/2024 17:08
《小傳日記》龍年魚缸開靚頭,3月都未升夠?兩會同業績都要吼!
《小傳日記》啱啱個2月係農曆年前後,之前魚缸已經九死一生,但可能阿爺都唔想新年流流死氣沉沉,於是過年前開始終於肯出猛招,力挽中港股海狂瀾,話畀缸友知道魚缸係「真.見底」,先成功修復孖屐信心,令AH場出現久違嘅轉勢! 2月初,藥明(02269)繼續遭到夾擊,孖屐繼續發酵美國議會提議制裁中資生科公司嘅議案,藥明系由1月初帶落嚟嘅跌勢仲要持續。雖然係美國發起嘅議案,但A場借題都有唔少「發揮」,藥明系狂隊,好大程度上都係由於沽空造成,所以當阿爺宣布限制「轉融券」交易之後,拋售藥明就成A場淡友嘅告別作,隨後淡友平倉,藥明系先終於企穩。 今趟阿爺真係唔係得個「講」字,救市措施遍地開花,廣州同上海都先後撤銷限購,以保交樓為目標嘅「項目白名單」都持續擴容,2月獲列入白名單嘅樓盤都已經有幾千個。到月中阿爺繼續保送樓市,宣布不對稱減息,一年期LPR維持不變,五年期LPR大減25基點,創下LPR史上最大減幅,令原本已經回升緊嘅魚缸進一步拉升,上證綜指重上三千心理大關,恒指都自個半月以來第一次重上16800。 香港亦終於有好消息,2月28號波叔個「餅」終於出爐,終於等到財爺一句「撤辣」,係「撤」而唔只係「減」,三項辣招全撤,即刻刺激地產股全線急升,呢幾日都見到各大地產中介間間都貼大字報宣傳「全撤辣」!係就係唔辣,不過都唔係好夠甜,復常已經一年有多,今年都一如預期無消費券,而且都只係得個別稅務減免,主動嘅派糖措施近乎係無,所以今次份「筆直」都只係得地產中介最興奮。 嚟緊3月,孖屐焦點都係先睇兩會前會唔會再有好消息,其次就當然係業績期,過去呢個幾星期都已經開波,暫時整體業績表現都係五五波,寄望科技股表現可以好過預期啦,就真係17000在望喇,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情