《魚缸博客》第三季係各大運動品牌出新鞋款嘅時期，好似Ａｄｉｄａｓ喺７月就出咗旗艦跑鞋Ｕｌｔｒａｂｏｏｓｔ嘅最新一代，而神州呢邊都唔輸蝕，特步（０１３６８）最近都出咗新款系列。　　特步早兩日就舉行記者會發布新一代冠軍版跑鞋「１６０Ｘ系列６﹒０」，新系列主打兩大核心科技，包括「ＸＴＥＰ　ＰＯＷＥＲ動能科技升級－ＧＴ７００碳板」以及「ＸＴＥＰ　ＡＣＥ輕彈科技升級－射胚發泡」。其中包括三個款式，分別係「６﹒０」、「６﹒０　ＰＲＯ」以及「６﹒０　ＭＯＮＸＴＥＲ」，零售價分別為９９９元人幣、１２９９元人幣及２５９９元人幣，其中「６﹒０　ＭＯＮＸＴＥＲ」全球限量２０００對。　　據講今次６﹒０升級版進一步減輕鞋身重量，「６﹒０　ＰＲＯ」輕磅接近兩成，同時回彈同抗衰性能方面比上一代都有所提升，令用家跑步嗰可以慳多大約兩公里嘅體力。　　新鞋銷量有待公布，但過去半年特步業績表現都尚算唔錯，中期純利賺多１３％去到７﹒５２億人幣，收入多一成有７２﹒０３億。更重要係佳績反映喺派息，中期息派１５﹒６仙港紙，按年多１４％。肯派息嘅股一般都唔會太衰，特步上個月放榜打後就一路守穩１００天線，近期更加繼５月以來再度瀕臨２５０天線考驗，破唔破到就睇今次。近期百天線企穩，更加早喺７月畫咗個３﹒９銀嘅雙底支持，雙重保險支持應該唔細，後市就要睇吓市況得唔得，如果嚟緊上面零售數據唔好太差，特步如果破到牛熊線阻力就有望試一試上５﹒５銀，最樂觀可以試埋６銀，而最重要都要大市配合。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票