02/04/2024 17:08
《小傳日記》未開賣先減價!新車全線30萬以下!小米兵不厭詐?
《小傳日記》業績期一完,本以為焦點會喺壓軸放榜嘅重磅股身上,點知一早出咗成績表嘅小米(01810)呢個時候先嚟搶鏡,收到上個禮拜五先肯為SU7開價,即時成功突圍。 SU7喺3月28號登場,最終公布標準版售價由21﹒59萬人仔起,Pro版24﹒59萬人仔,而最高配版Max都係29﹒99萬人仔,全部都係30萬人仔以內,比起之前孖屐預期嘅30萬人仔起跳平咗一大截,成為復活節期間最大隻嘅「出奇蛋」。 標價震撼準買家,銷情更加震撼孖屐。據講小米車一到門市,趁墟嘅人龍就無停過,個個都想一睹小米老字號出嘅新車,結果條隊排到商場落閘為止。當然多人睇都多人買,如果一直有吼住SU7嘅準買家,一見到呢個靚價恐怕都會忍唔到手。上面有網媒報道,SU7發表4分鐘之後,落大訂人數就已經過萬架,未夠半個鐘就成5萬架!唔少賣車行家都話咁嘅速度實在少見。 雷軍發布SU7大會後承認,原本真係唔捨得咁平賣,標準版原價係要22﹒9萬人仔,MAX版更加要35萬人仔,但考慮到減價潮影響,所以「SU7定價既要讓消費者覺得有誠意,同時虧損也要讓小米能扛得起」,所以就「未開賣先減價」,一律30萬人仔以下。 SU7售價係就係低過預期,但係呢個預期唔係來自孖屐,而係來自小米同雷軍,小米再一次贏喺消息戰上。自小米開發新車以來,小米官方對於消息流通就好似起咗個水壩一樣,游刃有餘咁控制小米車消息定時定量咁流出。雖然小米曾經敲鑼打鼓話,要捉拿惡意曝光保密資料嘅行為,但係流出嘅資訊都啱啱好成為炒作嘅材料。 SU7開發時間長,每隔一段時間就總有些少關於小米車嘅傳聞出現,唔多唔少,正好維持住話題,又唔會過分聚焦。到埋牙階段,正當孖屐都密切留意小米車定價,官方就開始嚴密禁止最終定價流出,令孖屐嘅好奇心愈來愈大。於是就由雷軍漏一漏嘴提到小米車「天生麗質難賤賣」,「小米汽車不會定價在20萬元以下」,為孖屐塑造「小米車唔平」嘅期望管理,隨後就一次過公布全系列30萬人仔以下,將壓抑嘅好奇心徹底釋放,有流量更加有變現力度,24小時就賣出差唔多8﹒9萬架。 無預期變成大超預期,SU7嘅發布至銷售堪比原子彈爆發原理。小米車出爐,結果都係用返賣手機嘅老招數「平價搶攻」,而新招就係多咗少少期望管理,效果居然咁有殺傷力,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票